O proxecto ‘Novas voces para a lingua‘, lanzado pola Real Academia Galega e a Universidade de Santiago de Compostela conta coa participación da futbolista galega Vero Boquete. A deportista é a protagonista do primeiro episodio da serie ‘Conseguiremos‘.
Esta iniciativa busca achegar a lingua galega á xuventude a través de distintas pezas audiovisuais coa colaboración de referentes en ámbitos como a música, o cine, a ciencia e o deporte.
Neste último, o turno foi o de Vero Boquete. A xogadora falou sobre os seus primeiros pasos no mundo do fútbol como muller e da morriña que sinte cando se atopa lonxe de Galicia, así como do cambio na percepción da propia lingua entre os e as galegas.
A entrevista realizouse no estadio que leva o seu nome, o Vero Boquete de San Lázaro, en Santiago de Compostela. Tema sobre o que tamén fala a futbolista, que admite que “nunca pensei que tería un estadio co meu nome. Pero xa non é que sexa o meu nome, senón que sexa nome de muller. Antes relacionar fútbol e mulleres non era tan doado”.
Vero Boquete: “Antes relacionar fútbol e mulleres non era tan doado”
Os seus inicios no deporte tampouco foron fáciles. Filla dun adestrador e irmá dun xogador, a pequena Boquete tamén quería ter o seu oco no mundo do fútbol, pero cando quixo xogar, “atopeime unha norma federativa que prohibía ás nenas xogar cos nenos”, recorda na entrevista.
Vero Boquete: “Escoitar o galego é estar na casa”
Agora, tras o seu éxito en varios países e unha capitanía coa Selección Española, a galega recoñece que “para min, que estou fóra, (o galego) ten moito valor. Escoitar o galego é estar na casa”. Así mesmo, considera que a poboación galega percibe a lingua propia doutra maneira, xa que cando ela era cativa “só se usaba na casa e na aldea”.
Vero Boquete: “A lingua e o deporte teñen un camiño longo que percorrer”
En conclusión, malia os avances no fútbol feminino e no uso do galego, Vero Boquete considera que “a lingua e o deporte teñen un camiño longo que percorrer”.
