Unha década practicando a esgrima dá para moito. A coruñesa Vera Pereiro Concha, tiradora do club 100-Tolos da Coruña, leva máis de media vida practicando este deporte. A súa arma é a espada e a súa categoría é a M17, é dicir, a de menores de 17 anos, pero está a competir incluso na absoluta. Apunta maneiras. É a segunda galega no ránking absoluto con só 16 anos, e a primeira galega no ránking estatal, no que era sexta ata esta fin de semana. Logo do Torneo Villa de Alcobendas descendeu ata a 15.ª posición.
Logo de pasar no último mes por unha concentración do Programa de Formación Continua de Alto Rendimiento (PFCAR) e citas como o Trofeo Internacional Satélite de Espada Masculina e Feminina, a tiradora coruñesa Vera Pereiro Concha vai acudir do 8 ao 9 de novembro a unha competición europea onde será a única galega na modalidade de espada. Trátase da ‘Budapest Cup Cadet Circuit Competition’. Na cita si haberá deportistas galegos en categoría masculina.
Di o seu adestrador, Manel Villadóniga, que ser teimuda é unha das súas virtudes. Ela mesma conta que non baixa os brazos facilmente.
A.N. Como tomou contacto coa esgrima?
Vera Pereiro: Cando tiña seis anos, sempre que pasaba pola Casa de Auga, vía aos tiradores de esgrima adestrando. Sempre pensaba, “gustaríame probar algún día”. E un día chegaron unhas persoas do club, ao saír dunha carreira de Coruña Corre déronnos un papel para probar e apuntámonos. A partir de aí quedei enganchada a esgrima.
A.N.: Canto tempo leva practicando esta disciplina?
Vera Pereiro: Desde os seis anos, así que dez.
A.N.: En que especialidade compite, espada, florete ou sable?
Vera Pereiro: Sempre en espada, aínda que hai dous anos tirei tamén por equipos en florete para apoiar ao equipo de florete do meu club, pero son de espada.
A.N.: Hai moita diferencia entre armas?
Vera Pereiro: Si, bastante. Cada un ten as súas dificultades. Por exemplo, a espada é difícil, tes de branco todo o corpo, pódenche sorprender as pernas, os brazos… o corpo todo. O florete tamén é difícil, hai prioridad e iso é máis complicado. Cada unha ten as súas cousas…
A.N.: En que categorías está a competir neste momento?
Vera Pereiro: Este ano é o segundo ano de M17, que é menor de 17 anos, pero tamén estou a tirar en M20, en absoluto. Hai dous anos fun segunda nun nacional en Barcelona, oitava nun campionato de España, e despois, fai catro anos, fun primeira nun criterio como campionato de España, pero de categorías menores.
A.N. Cales considera que son os seus principais méritos?
Vera Pereiro: O máis recente no ámbito estatal foi a última competición que tiven en M20, quedei no taboleiro 32, e agora estou entre as seis primeiras na clasificación, na miña categoría.
Este ano aínda non tivemos ningunha competición, pero o ano pasado en Galicia estaba de segunda na miña categoría, e de primeira na categoría seguinte, que era M20. Este ano aínda está pendente por ver que tal.
A.N. Que considera máis importante na esgrima: técnica, táctica nun combate, capacidade de control de situacións de estres competitivo?
Vera Pereiro: Pois é unha pregunta bastante complicada, porque ao final depende tamén de como che atopes cada día. Se cadra, eu chego un día á sala e noto que teño a mente despexada, e son capaz de ver as accións que me están facendo os meus rivais, contrarrestalas, pensar pola miña conta… E despois, ao día seguinte, pois é ao contrario, non son capaz diso, pero si que me saen outras cousas máis difíciles. Ao final depende de como te atopes cada día.
Ao final está todo interconectado, porque se falla a mente, despois tamén che falla a técnica e a táctica. Ao final é sempre o que nos di o noso adestrador, que temos que ter moi en conta todas esas cousas.
Pero desde o meu punto de vista, eu diría que o principal é a mente, o que pensas, a túa atención, a concentración que tes non asalto, porque ao final a técnica e a táctica pódense traballar, pero a mente é máis difícil.
Vera Pereiro: “Non me veño a baixo facilmente”
A.N. Cal considera que é o seu forte?
Vera Pereiro: Diría é que non me veño abaixo tan facilmente, é dicir, que se vou perdendo por moita diferenza, son capaces de manter a compostura un pouco. Manter a calma e remontarse.
A.N. A que deportista ten como referente?
Vera Pereiro: Eu diría que aos meus compañeiros da sala, porque ao final son os que adestro, tiro con eles, gústanme as accións que fan, e pidolles consello para que me axuden.
A.N. Con que espectativas vai a Budapest? A aprender, a conseguir pausas deportivas, a vivir experiencia?
Vera Pereiro: Pois a verdade é que este ano gustaríame pasar da pool, que é a primeira rolda, chegando a unha eliminatoria. Foi o máximo que fixen no ano pasado, pero en Grenoble. En Grenoble hai case a metade de persoas participando, polo que será un pouco máis doado. Teño obxectivo de facer un bo resultado en Budapest.
Vera Pereiro Concha, rumbo ao ‘Budapest Cup Cadet Circuit Competition’ de esgrima
Manel Villadóniga: “Ser teimuda é a principal fortaleza de Vera Pereiro”
PEZAS AUDIOVISUAIS RELACIONADAS:
