Os éxitos acumúlanse no vestiario do Durán Maquinaria Ensino. Tres vitorias consecutivas sitúan ás lucenses como un dos firmes candidatos á loita polos play offs, nun momento no que as de Cantero están en estado de gracia. “Estou moi orgullosa do traballo do equipo”, declaraba tras o último encontro Vega Gimeno.
A alero foi elixida MVP do encontro ante o Ciudad de La Laguna Tenerife, ao que marcou 17 puntos e no que acadou 4 rebotes que lle mereceron 16 créditos valorativos.
Este útimo trunfo vale dobre na tempada, ao ser contra un rival directo que se sitúa un posto por riba do Durán Maquinaria Ensino. As galegas non lograron levarse o basket average fronte ás canarias, pero sumaron unha vitoria moi importante.
O rival non puxo as cousas fáciles. Malia de vir xogar un partido europeo na mesma semana, o nivel das canarias estivo en todo momento alto, e o encontro foi “correoso e físico” en palabras do adestrador lucense, Carlos Cantero. O plan do Ensino de controlar ao contrincante sen deixarlle correr e sen cometer erros funcionou.
Carlos Cantero: “Fixemos boas lecturas do ‘pick and roll’, xa que para estas situacións temos a unha das mellores bases da Liga”
Ademais, tal e como indica o técnico, “conseguimos frear ben ás súas principales xogadoras, a Atkinson e Taylor“. As galegas souberon facerse co control do partido, facendo “boas lecturas do pick and roll, xa que para estas situacións temos a unha das mellores bases da Liga”, apunta Cantero.
O adestador do Durán Maquinaria Ensino, Carlos Cantero, explicaba: “Conseguimos frear ben ás súas principales xogadoras, a Atkinson e Taylor”
As claves do trunfo do Ensino
“Quizais na primeira parte estivemos bastante acertadas no tiro exterior e na segunda xogamos mellor, con situacións de balón interior e de poste alto e poste baixo”, reflexiona o adestrador. Tamén recoñeceu a gran actuación de Vega Gimeno en defensa, freando os ataques locais.
A xogadora coincide en tildar o encontro de “fisicamente moi duro”, aínda que considera que foi máis complicado para as canarias. “Viñan dunha semana moi dura da EuroCup, con moitos partidos e moitos minutos e creo que pagaron o cansancio acumulado”, analiza a alero.
Os erros do Ciudad de La Laguna non desmerecen o traballo das lucenses. En palabras de Vega Gimeno, “tivemos algunhas lagunas nas que creo que non estivemos o suficientemente duras do que hai que estar fronte a un equipo así, pero estou super contenta co traballo do equipo”.
Vega Gimeno, xogadora do Ensino: “Tivemos momentos nos que non estivemos o suficientemente duras”
A alero coincide co seu técnico en destacar como o Durán Maquinaria Ensino logrou frear a Atkinson e Taylor nas filas rivais e como o acerto lucense aumentou cara a segunda metade. “Creo que non era un partido nada fácil e fixemos unha lectura do partido moi boa”, declara.
Van den Adel: “Loitamos por todo e con todo o equipo, con todas as xogadoras. Esta foi a clave hoxe”
Pola súa banda, Natalie Van den Adel, autora de seis puntos do Ensino, apunta que o duelo tamén se gañou grazas á actitude “loitadora” do cadro visitante. “Loitamos por todo e con todo o equipo, con todas as xogadoras. Esta foi a clave hoxe”, recorda a deportista.
Unha vitoria con vista ao futuro
“A nivel moral é moi importante esta vitoria”, asegura Vega Gimeno. Os dous puntos do trunfo deixan ás galegas na sexta posición da Liga Feminina Endesa, con 33 puntos. Gañar este último duelo da forza ás xogadoras de Carlos Cantero “para seguir e afrontar con enerxía o partido en casa contra o Valencia e para ver que non estamos tan alonxadas dos equipos que están enriba”.
“Estamos encadeando un bo xogo nos últimos partidos e, sobre todo, un xogo coral, de equipo, que creo que nos vai dar moitas vitorias”, reflexiona Gimeno.
Vega Gimeno: “Estamos encadeando un bo xogo nos últimos partidos e, sobre todo, un xogo coral, de equipo, que creo que nos vai dar moitas vitorias”
Para a alero, vencer nun partido destas características da confianza ao conxunto galego para crer en si mesmas. “Facendo o baloncesto que estamos facendo de ler, xogar en equipo e todo isto, podemos levarnos encontros como este. Ao mellor na primeira volta non estabamos a este nivel, pero agora si”, declara a xogadora.
Agora só queda manter este bo nivel competitivo e desfrutar. Algo que xa están facendo no Ensino, xa que tal e como asegura Gimeno, “estamos moi contentas, desfrutando e facendo o que temos que facer”.
A viaxe a Tenerife serviu para traer dous puntos de volta e para que o Ensino fixera grupo. “As cousas como son, fixemos moita piña e a vitoria sabe a gloria”, admitiu a alero sobre unha celebración máis que merecida.
O Ensino suma e segue, impoñéndose ao Ciudad de La Laguna (63-72)
