O rugby galego é pasado, presente e futuro do rugby español. Tres xogadoras do CRAT Residencia Rialta foron convocadas á última concentración das Leonas, un combinado estatal no que o equipo coruñés sempre tivo moita pegada. Proba disto é o recoñecemento dentro do XV Ideal da Selección de catro xogadoras vinculadas ao club galego: Paula Medín Alevín, Helen Roca, Vanesa Rial, Bimba Delgado e Berta García.
Nas últimas semanas a Federación Española de Rugby (Ferugby) lanzou en redes distintas votacións para escoller á mellor xogadora en cada posición das que fixeron historia coa camisola das Leonas.
Varias deportistas vinculadas ao CRAT saíron como candidatas e finalmente cinco forman parte deste XV Ideal da última década. O seleccionador José Antonio Barrio Yunque propoñía a catro para cada posto e a afección do deporte oval votaba ás súas favoritas.
Na primeira liña cólase unha ex xogadora da formación coruñesa. Bimba Delgado forma parte deste muro vermello grazas á súa contundencia. Xa na terceira liña está Alevín, unha das estrelas do CRAT e das Leonas desde hai moitos anos e que sigue sendo fundamental en ambos equipos.
No centro está unha parella galega, formada por Helen Roca e por Vanesa Rial, dúas xogadoras que marcaron o rugby feminino galego e español. Roca é a actual adestradora (xunto con Jos Portos) do conxunto que milita en Liga Iberdrola e foi unha das pioneiras no deporte oval. Rial, pola súa parte, foi fixa nas seleccións XV e 7s ata que unha lesión a apartou dos campos como xogadora. Aínda así, segue vinculada ao rugby como Seleccionadora de rugby 7 feminino sub18.
Rematando a lista de deportistas relacionadas co CRAT, está Berta García, unha asturiana que pasou polo conxunto galego e brilou na súa carreira tanto na modalidade de quince como na de sete.
Tamén foron candidatas Rocío García, unha lenda viva das Leonas que bateu no seu momento os récords da Selección e acadou a cifra de 64 caps e Elsa Porto, con máis dunha década de rugby ás súas costas.
Nesta ligazón podes consultar o listado completo de candidatas.
O adestrador da Selección Española, Yunque, admitía que “elixir un XV da década é moi complicado. Moitas das xogadoras que participaron nas votacións estiveron en varios Mundiais. E sen dúbida, todas fixeron moitísimo polo rugby español e contriburion en gran parte a que desde os comezos ata agora, esteamos na elite mundial codeándonos coas mellores”.
Nas filas de este conxunto de alto nivel seguen presentes as xogadoras do CRAT. Tres delas (Alevín, Mona Castelo e Paula Requena) están a formar parte da última convocatoria.
‘Alevín’, Requena e Castelo, convocadas coa Selección XV Feminina
