Hai 18 anos que Vanessa Rial nacía en Compostela, residía ata hai un mes en Sigüeiro (Oroso) ao tempo que era unha cambresa máis ao xogar no CBS Cambre desde hai catro tempadas, as dúas últimas na Liga Nacional División de Honra, a máxima categoría estatal denominada na SSL (Spanish Softball League). Chegou a debutar coa Selección Española desta disciplina.
La selección española absoluta de #sófbol debuta hoy en la Cataluña Softball International Cup enfrentándose a #Aruba a las 18.30 en #Barcelona 🥎💪🏼
Esta es la alineación con la que saldrá el equipo nacional en la segunda edición de este torneo internacional 🔝#VamosEspaña 🇪🇸 pic.twitter.com/BVyInGaS2k
— RFE Béisbol y Sófbol (@RFEBS) July 5, 2024
Vanessa Rial leva xogando ao softball desde os seis anos, iniciouse no Club Leones de Oroso. Todo mudou este inicio de curso cando tomou a decisión de aceptar unha proposta desas ás que é complicado dicirlle: non. Esta deportista de Sigüeiro cruzou o charco para trasladarse a vivir en Miami e xogar no MDC Sharks Softball da primeira división estadounidense.
Antes de marchar, no Concello de Cambre organizáronlle unha despedida da que fixeron parte representantes do CBS Cambre como María Fernanda Jóver (integrante do corpo técnico), Jhonny Pérez (presidente) e as xogadoras do club coruñés, pero á que tamén se sumaba o presidente do Club Leones Oroso, Franklin Salas, pechándose así un ciclo para a xogadora antes de mudar Galicia e España por Estados Unidos.
Na redacción de As Nosas quixemos saber máis sobre este novo reto deportivo e vital ao que se enfronta e tamén coñecela como xogadora.
A.N.: Cóntanos como te achegache ao sóftbol, Vanessa?
VANESSA RIAL: Empecei xogando ao béisbol cos Leones de Oroso. Participei en varios torneos e logo adestramos para o sóftbol e de aí fun cedida ao Club Béisbol Sótbol Cambre para xogar con elas.
A.N.: Cal é o teu forte nesta disciplina?
VANESSA RIAL: Considero que o meu forte neste deporte é a velocidade que me axuda a chegar rápido ás bases e a defender axilmente no campo.
A.N.: Practicas algún outro deporte?
VANESSA RIAL: Cando era máis cativa si practicaba algún outro, pero finalmente decidinme polo sóftbol.
Considero que o meu forte neste deporte é a velocidade que me axuda a chegar rápido ás bases e a defender axilmente no campo.
A.N.: Como chega a proposta de bolsa en USA? Postulácheste ti? Contactaron contigo? Como xurde esta oportunidade?
VANESSA RIAL: Contactaron comigo. Viranme xogar ao participar co CBS Cambre na División de Honor e xogar coa Selección Española absoluta. Precisaban unha xogadora da miña posición.
Vanessa Rial estudará no Miami Dade College e xogará no MDC Sharks Softball
A.N.: Para que universidade é a bolsa coa que acodes a estudar e xogar a Estados Unidos?
VANESSA RIAL: Da Miami Dade College. Se todo vai ben podería finalizar a miña carreira aló.
A.N.: Vas cursar unha titulación equivalente ao que aquí sería Ciencias do Deporte, certo?
VANESSA RIAL: Correcto.
A.N.: Cal é a túa aspiración ao cursar eses estudos? Refírome unha vez que a túa carreira deportiva remate (espero que dentro de moitos anos) presumo que pretendes seguir vencellada ao deporte como profesión. Nese sentido tes pensado que rol quererías desempeñar? Adestradora, preparadora física, docente, investigadora, xestora…
VANESSA RIAL: Gustaríame seguir en contacto co deporte sendo adestradora persoal ou mestra de educación física, e, obviamente, poder ser adestradora de sóftbol.
A.N.: Xogarás no equipo MDC Sharks Softball? En que categoría xogan dentro das ligas de EE.UU.?
VANESSA RIAL: Xogan na Primeira División.
A.N.: Sen dúbida parece que esta bolsa é unha grande oportunidade. Que esperas atoparte? Cales son as túas expectativas?
VANESSA RIAL: Teño expectativas moi boas sobre este equipo. Coido que o nivel dos partidos vai ser bastante bo polo que me vai axudar a mellorar e ver outro tipo de sóftbol moi diferente ao de España.
A.N.: O idioma manéxalo ben?
VANESSA RIAL: A verdade, o inglés nunca foi o meu punto forte, pero estou certa de que poderei melloralo axiña.
Teño expectativas moi boas sobre este equipo. Coido que o nivel dos partidos vai ser bastante bo polo que me vai axudar a mellorar e ver outro tipo de sóftbol moi diferente ao de España.
A.N.: Cantas veces ao ano contas co poder vir a casa?
VANESSA RIAL: Conto coas vacacións de Nadal, en decembro, e ao finalizar o curso que sería aló por maio-xuño.
A.N.: Houbo algún que outro choro de despedida desde a emoción de perder o contacto continuo coas compañeiras. Houbo algún xesto, algunha frase, algo que che fixera especial ilusión?
VANESSA RIAL: O que podo salientar con moita felicidade e tristura é a cálida despedida de todas as persoas do club, amosando todo o mundo un gran cariño e aprecio cara a min, repetíndome sempre a frase de que van estar sempre comigo maila distancia.
A.N.: Que é o que coidas que vas botar máis de menos?
VANESSA RIAL: Botarei moito de menos moitas cousas, pero sobre todo á miña familia, destacando á miña nai que desde o día un estívome apoiando neste deporte e á mellor compañeira de equipo te tiven sempre, a miña irma que tamén xoga no CBS Cambre.
A.N.: Cal é a túa primeira impresión unha vez estás en Miami?
VANESSA RIAL: Miami sempre foi un sitio que me chamou a atención. Paréceme un paraíso e amo o xeito en que ven o deporte.
A.N.: Seguirás en contacto coas compañeiras do CBS Cambre, non si?
VANESSA RIAL: Claro! Vounas ver xogar igualmente por YouYube e vounas mantar informadas de todo.
Miami sempre foi un sitio que me chamou a atención. Paréceme un paraíso e amo o xeito en que ven o deporte.
A.N.: Unha última mensaxe para elas?
VANESSA RIAL: Creo que sábeno todo. Só podo dar as grazas polo cómoda que me sentín con elas tanto dentro como fóra do campo. Que sigan a xogar a este deporte coas ganas e a ilusión que transmiten sempre.
