A Real Federación Galega de Fútbol (Futgal) presenta ‘Xogando con Futgal‘. un innovador proxecto coa futbolista Vane Sotelo como imaxe da campaña. A través desta iniciativa, o organismo pretende promover un estilo de vida saudable e a práctica do fútbol sala nas escolas galegas.
Neste luns, 3 de maio, a entidade presenta o programa que percorrerá Galicia para promocionar o fútbol sala, unha especialidade de alto nivel en terras galegas, con referentes de calidade.
Por este motivo, a Federación escolleu a Vane Sotelo, actualmente xogadora da AD Alcorcón e candidata a Mellor Xogadora dos premios FutsalPlanet. En categoría masculina, o escollido foi Adrián Martínez, xogador de O Parrulo Ferrol.
Segundo indica Futgal: “tanto o ferrolán como a ourensá encarnan e transmiten á perfección os valores cos que a RFGF pretende contaxiar a todos os nenos e nenas de Galicia grazas a esta iniciativa pioneira”.
Xogando con Futgal
Este proxecto educativo desembarcará nos próximos meses en varios colexios da comunidade. En cada un deles, aproveitando as clases de Educación Física, levarase a cabo unha sesión teórica e outra práctica na que o protagonista será o balón.
Esta actividade realizarase co alumnado de entre 6 e 13 anos, que participará en sorteos de material deportivo e recibirá un agasallo en agradecemento por participar na xornada.
A cada centro que participa nesta iniciativa de Futgal acudirán varios representantes dos clubs máis representativos da zona. Estes serán os encargados de transmitir os valores propios desta disciplina deportiva, unha das especialidades máis practicadas do mundo.
O calendario e centros confirmados
‘Xogando con Futgal’ comezará o próximo cinco de maio e durará ata o día 30. A iniciativa chegará a varios colexios, co Divino Maestro de Ourense como escola escollida para a presentación en sociedade do proxecto.
As datas confirmadas son as seguintes:
- 5 e 6 de maio: Colexio Divino Maestro de Ourense
- 11 e 12 de maio: Colexio Mercedarias de Ferrol
- 12 e 13 de maio: Colexio San Narciso de Marín
- 20 e 21 de maio: Colexio Plurilingüe Labor de Vigo
A promoción do futsal galego tamén chegará a Santiago, Lugo e A Coruña e a todos os centros educativos que o soliciten no teléfono 981 900 600 ou no mail futbolsala@futgal.es.
