Cada vez queda menos para a gala dos Annual Futsal Awards organizada por Futsalplanet, polo que xa se deron a coñecer os nominados nas distintas categorías. En al menos catro delas haberá representación galega. A cancerbeira do Poio Pescamar Caridad e ao Pescados Rubén Burela súmanse agora Vane Sotelo e Peque, que optan ao premio de Mellor Xogadora.
Patricia González, coñecida como Peque, capitá do Burela, repite nominación entre as mellores xogadoras do mundo. Xa o ano pasado estivo nominada a esta categoría, no que a vencedora foi por sexto ano consecutivo a brasileña Amandinha. Peque quedou entón na cuarta posición, algo peor que no 2016, cando tamén figurou no ránking, desta vez como terceira mellor futbolista.
Pola súa parte, Vane Sotelo, futbolista da AD Alcorcón, volve á gala despois de quedar fóra do listado nos últimos seis anos. A última vez que formou parte da clasificación de mellores xogadoras do mundo foi no 2014, cando logrou a sétima posición.
De ganar algunha das dúas galegas, sería a primeira vez en 13 anos que unha xogadora española o consegue. A última foi Eva Manguán, na edición do 2007. Unha conexión máis recente ao fútbol galego está na brasileña Cilene Paranhos, agora xogadora do Burela, que logrou o galardón no 2008 e Vanessa, compatriota e tamén das Guerreiras Laranxas, que o acadou no 2010.
Consulta nesta ligazón as futbolistas nominadas a Mellor Xogadora.
Galicia, terra de futsal
Desta forma, as dúas xogadoras de futsal únense a Caridad como porteira e o Burela como equipo representando o fútbol galego e o español nos premios que recoñecen ás mellores do mundo e dando proba do alto nivel que hai deste deporte en Galicia.
Só hai que recordar que a última final da Copa da Raíña e da Supercopa foron disputadas entre galegas, o Poio e o Burela, que ven de proclamarse tricampión xa que lograra tamén o título de Liga.
