O Ourense Envialia conserva á súa cancerbeira para a vindeira tempada. Vane Barberá seguirá defendendo a portería ourensá durante un curso máis con opcións a un segundo.
A xogadora séntese en casa no club galego desde o primeiro momento: “A primeira semana que cheguei aquí fixéronme sentir en casa. Este equipo é familia, sempre antepoñen á persoa por riba da deportista. O sentimento Envialia é algo que non se pode explicar, é algo que te chega dentro”.
De cara á vindeira campaña, Barberá espera “desfrutar, desfrutarnos e facer desfrutar”. A porteira ten claro que é “esixente, incorformista, imperfecta, pero cunha gran ambición por reinventarme constantemente”. Pola súa parte, o Ourense Envialia engade os seus valores de “compromiso, lealdade, traballo, profesionalidade, ilusión e un longo etc”.
Vane Barberá: “Quédome coa unión do vestiario e o compromiso das miñas compañeiras”
Respecto á xa rematada tempada 2020/2021, a gardameta a define como “a máis difícil que se recorda con diferencia”. Por iso, destaca ao grupo e o vestiario: “Quédome coa unión do vestiario e o compromiso das miñas compañeiras, cantas máis pedras había no camiño, máis fortes nos volvíamos com grupo e como equipo. Sempre souben que tiñamos un gran grupo, pero todo o vivido faime ter claro que con elas iría a calquera sitio”.
No próximo curso as ourensás poderán seguir desfrutando de Barberá baixo paus, nun club cuxa intención é a de contar e formar a unha porteira de futuro, tendo en conta os prazos e tempos necesarios.
