O CV Arenal Emevé de José Valle non foi quen de sumar unha vitoria no último partido, malia forzar o encontro ata o quinto set, obrigando ao Gran Canaria Urbaser a empregarse a fondo ata o final.
As loitadoras fixeron honra ao seu nome, pero non conseguiron rematar a fazaña. “Gustaríame ter gañado. É o noveno ‘tie-break’ que xogamos e creo que gañamos dous unicamente. Voume coa sensación de que nos conformamos cando gañamos o cuarto set e dimos por bo ir ao quinto e o punto. Fastídiame que nos conformaramos”, declarou o técnico en rolda de prensa.
O CV Arenal Emevé acariña a fazaña ante o Gran Canaria Urbaser
O preparador admite que as rivais eran un equipo potente, “e ía ser moi difícil gañales no quinto set pero as levamos ata alí, así que por que non podiamos pensar que xogando ben podiamos apretalas e gañarlles?”, reflexionou.
Como contrapunto positivo, o Emevé comezou o partido xa enchufado e moi motivado, dando unha imaxe distinta ás xornadas anteriores. “Vimos de partidos nos que entramos moi mal. Normalmente despois de facer un partido tan nefasto como o da semana sempre se fala no vestiario, hai unha reprimenda. Todo o mundo sabe que non se poden empezar así os partidos e tratas de corrixir esas actitudes”, apunta José Valle.
Plena motivación antes da Copa
Este venres, as loitadoras teñen unha gran cita marcada no calendario. O Emevé disputará en casa, en Lugo, a Copa da Raíña. “Reservei toda a fin de semana para acompañalas, do venres ao domingo, que esperamos estar na final. Elas están máis que motivadas”, apuntou o adestrador.
José Valle: “Elas están máis que motivadas. Imos xogar na casa e non creo que agora mesmo exista algo que motive máis que iso”
“Imos xogar na casa e non creo que agora mesmo exista algo que motive máis que iso. Como xogadoras, moitas ao mellor tardan anos en volver vivir esa situación e ao mellor non a volven vivir aínda que teñan unha vida deportiva longa. Hai que aproveitala”, asegurou Valle.
