Hai empates que saben doces e outros que amargan. O desta xornada do HC Deportivo Liceo é dos primeiros. As xogadoras herculinas finalizaron en táboas (5-5) un partido diante dun dos rivais máis completos da OK Liga, o Telecable HC de Xixón. As asturianas estiveron, ademais, arroupadas pola súa afección que se desprazou á Coruña para alentar as patinadoras.
O Telecable, un dos catro cocos da OK Liga neste curso 2021-22, chegaba líder á Coruña e marcha líder, pero colleitou menos puntos dos que contaba. As galegas do HC Deportivo Liceo acadaron un valiosísimo empate diante das de Xixón (5-5).
O conxunto liceísta, hoxe si lucindo as súas tradicionais cores verdibrancas, adiantouse no marcador aos dous minutos de xogo. Dous tantos consecutivos de Adriana Soto que amosaba así, unha vez máis, o seu olfato goleador. A arxentina sumou nesta terceira xornada tres goles máis á súa conta particular. E van seis.
No minuto sete Alba Garrote, outra xogadora que tampouco se queda atrás á hora de materializar ocasións, anotaba o 3-0. Na bancada do Pazo dos Deportes de Riazor medraba a ilusión. Meterlle o medo no corpo a todo un Telecable non é tarefa sinxela.
Fernando Sierra pediu tempo morto e reconduxo ás súas pupilas. Así, antes de chegar aos cuarto de hora de partido Natasha Lee empezaba recurtar distancias para o Telecable HC. Anotou o 3-1 no minuto 9 e o 3-2 no 11. O empate deixoullo á súa compañeira Sara Roces que subía o 3-3 no minuto 16.
Nin era doado sobre o papel imporse as asturianas, nin estaban dispostas a que o fose sobre a pista. As táboas devolvían o partido ao estadío inicial. Foi de novo Alba Garrote a que adiantou ás galegas do HC Deportivo Liceo (4-3). Pero antes de chegar ao descanso, a contesación de Milagros Carrera foi o 4-4. Con ese marcador ambos os dous equipos patinaron rumbo a vestiarios.
Na segunda metade, con todo por decidir, os dous equipos foron a polo partido sen desguarnecer as súas costas. O primeiro en ter ocasión de anotar, nesta ocasión desde o punto de penalti, foi o HC Deportivo Liceo. A coruñesa María Sanjurjo, que se enfrontaba ás súas ex compañeiras, non fixo gol. Avisaron as verdibrancas con tiros que petaron no pau ou que saíron por fora lambendo un deles, e incluso unha bóla paseándose pola liña de gol se chegar a traspasala. Na bancada cantábase o gol, pero non.
Foi no minuto 31 de partido cando a maxia de Adriana Soto volveu facer acto de presenza sobre a pista do pazo. A arxentina anotaba o 5-4 e volvía adiantar ás galegas que estaban aguantando as chegadas das asturianas. O Telecable HC xerou perigo diante da meta de Viki Carreta (unha vez máis excelente), nas transicións. Durante uns minutos as coruñesas non estiveron vivas á hora de recompoñerse en tarefas defensivas nos robos de bóla das asturianas. Así o Telecable Hockey Club imprimía perigo coas chegadas á contra.
En xogada, a concentración na defensa individual que dispuxeron sobre a pista as herculinas funcionaba como un reloxo, pero nas transicións, aí a cousa requeriu dun tempo morto e reaxustes que, finalmente deron resultado.
O gol do empate chegaría a 12 minutos do bucinazo final. Foi obra de Marta González que batía de penalti á cancerbeira local Viki Carreta.
Ocasións do Liceo e do Telecable
A partir de aí puido pasar calquera cousa. Os dous equipos nadaban e gardaban a roupa. Asumían riscos pero sen deixar vendida a súa portaría. Un gol podía decir o triunfo dun partido que ningunha das dúas escuadras quería rematar sen colleitar, canda menos un punto.
Loitouse, eso si, polo triunfo nun e outro bando ata o último ataque. Nada de contemporizar o resultado, nin de perdas de tempo aguantando a bóla. Houbo moito hoquei con cabeza e ambición.
O resultado foi un empate que semella xusto logo do visto sobre o parqué do Pazo dos Deportes de Riazor na Coruña. Con este novo punto no seu casilleiro ante un rival de primeiro nival como o Telecable HC, o HC Deportivo Liceo confirma que chegou á OK Liga para dar guerra.
O seguinte reto das liceístas na competición ligueira será visitar a cancha das segundas clasificadas, o Cerdanyola CH Feníe Energía que hoxe mesmo vencía 0-4 ao CP Las Rozas na súa cancha. Será o vindeiro sábado 27 de novembro contra das 20:00 horas. Outro oso duro de roer para as galegas que, abofé, que irán a terras catalás con toda a intención de rañar o máximo de puntos posibles.
As galegas seguen esperando á persoa que substituirá a Carlos Loureiro á fronte do banco. Entre mentres, o bloque verdibranco está a ser dirixido polo dúo conformado por Noemí Uzal e Marc Godayol. Na acta, para evitar sanción, figura como adestrador un emblema do club coruñes, Willy Duarte, xa que é preciso presentar un técnico con título estatal.
FICHA TÉCNICA
5) HOCKEY CLUB DEPORTIVO LICEO: Viki Carreta (p), María Sanjurjo, Alba Garrote, Luchy Paz e Adriana Soto – quinteto inicial -. Tamén xogaron: Naiara Vaamonde, Lucía Yáñez, Lara Yáñez e Cris Diz.
5) TELECABLE HOCKEY CLUB: Eva Mejido (p), Natasha Lee, Marta González, Nuria Obeso e Sara Roces – quinteto inicial -. Tamén xogaron: Milagros Carrera, Rebeca González e Sara Lolo.
GOLES: 1-0 (min.2): Adriana Soto. 2-0 (min. 2): Adriana Soto. 3-0 (min. 7): Alba Garrote. 3-1 (min. 9): Natasha Lee Suárez. 3-2 (min. 11): Natasha Lee Suárez. 3-3 (min. 16): Sara Roces. 4-3 (min. 21): Alba Garrote. 4-4 (min. 24): Milagros Carrera. 5-4 (min. 31): Adriana Soto. 5-5 (min. 38): Marta González (penalti).
ÁRBITROS: Albert Barba Gómez-Álvarez, exerceu como colexiado principal, mentres que Aarón Candanedo Leal foi o seu auxiliar. Non amosaron cartóns.
INCIDENCIAS: Partido correspondente á terceira xornada da OK Liga feminina de hoquei a patíns da FEP. O encontro foi disputado no Pazo dos Deportes de Riazor da cidade da Coruña ante unhas 200 persoas. Na grada estivo o presidente da entidad, Daniel Echevarría, que seguiu o partido como é habitual. Nesta ocasión estivo acompañado na grada pola concelleira de Deportes do Concello da Coruña, Mónica Martínez.
Marc Godayol: “As xogadoras fixeron un partido moi traballado e puidemos sacar un empate”
