Valentina Planes cumpliu prognósticos en Pontevedra. Esta fin de semana, en concreto o sábado día 30 de outubro, disputouse a quinta proba do Circuíto Galego Junior de Skateboard modalidade rampa, organizada pola escola de skate indoor Urban Culture Factory. Agardábase a participación de preto de medio cento de patinadoras e patinadores.
A coruñesa Valentina Planes foi primeira na categoría amateur seguida de Lucía Couñago. Na categoría feminina media o podio estivo ocupado por Xabela García, Marta Hermo e Sabela Fernández, nesa orde. Valentina Planes viña de ser terceira nas Urban Worls Series de Madrid e Lucía Couñago e outro dos nomes propios que despuntan no skate feminino galego.
Ver esta publicación en Instagram
A cita deportiva, organizada pola escola de skate da Urban Culture Factory en colaboración coa Federación Galega de Patinaxe, a Concellería de Deportes do Concello de Pontevedra e a Deputación Provincial, desenvolveuse nas instalacións indoor (skate park Cuberto) que a Urban Culture posúe na avenida de As Corvaceiras (número 44). Por mor das medidas de prevención de transmisión da COVID-19 estaba prevista unha limitación de aforo, permitíndose o acceso como público só as familias e adestradores das e dos deportistas que patinasen en cada quenda.
As clasificación nas diferentes categorías foron as seguintes:
Iniciación
- Antón Rodríguez
- Lucas Cacabelos
- Luca Souto
Feminino Medio
- Xabela García
- Marta Hermo
- Sabela Fernández
Masculino Medio
- Andrés Pece
- Iago Cabarcos
- Manu Soto
Amateur Feminino
- Valentina Planes
- Lucía Couñago
Amateur Masculino
- Luis Martínez
- Luis Cabarcos
- Lucas Meijoeiro
Unha cita para compartir trucos e tempo entre amantes do skate
Na presentación da proba o tenente de alcalde e concelleiro de Deportes, Tino Fernández, manifestaba que a celebración de eventos como este “resultan especialmente importante nun contexto no que un deporte como o skateboarding está cada vez máis de moda, que vén de facer o seu debut como deporte olímpico nos Xogos de Tokyo e que repetirá en París dentro de tres anos. Pontevedra converteuse ao longo dos últimos anos en pioneira e capital española, europea e mesmo mundial do piragüismo, o tríatlon, a loita ou o ciclocross, polo que non sería unha utopía que, coa nosa experiencia e os talentos emerxentes que temos, tamén o poidamos ser do skate”.
Segundo explicou tamén no acto previo á competición o responsable da organización e da escola da Urban Culture Factory, Toño Escudero, as e os deportistas afrontaban “con bastante ilusión as probas que quedan, que son esta nosa de rampla e unha última prevista para o mes de decembro”.
Pola súa parte, nese acto de prestación desta quinta proba do circuíto galego, o adestrador e profesor de skate da escola e do equipo da Urban, Fernando Tato Ezequiel Pinto, destaba o lado humano e de facer comunidade que permiten estas probas. En concreto dixo que na cita volverían a se atopar rapazas e rapaces “de toda a comunidade para compartir impresións, facer comunidade e amizades e quedar en contacto, que é o que máis se pode destacar deste tipo de probas”. Algo que se puxo de manifesto durante a competición que foi, sobre todo, unha cita para compartir tempo e trucos entre persoas amantes do skateboarding.
