Xa dixera Antonio Pernas na previa que o Valencia BC non é un equipo da liga do Ensino. A plantilla que manexa Rubén Burgos e os resultados colleitados ata o momento facían desa afirmación unha realidade indiscutible. Pero cada partido é un mundo e a esperanza, ó último en perderse. Con todo, a lóxica acabou por impoñerse en La Fonteta. As locais venceron por un contundente 85-50.
O Durán Maquinaria Ensino foi a vítima colateral da loita que o Valencia BC mantén co Spar Girona polo liderato na Liga Femenina Endesa e que fai que ningún dos dous equipos se permita perde comba. O conxunto laranxa suma, coa de hoxe, 13 vitorias consecutivas.
Manteñen un ritmo imparable. Son o equipo máis anotador (1400 puntos) e dos que menos canastras reciben (1092 punto encaixados). O dito, un conxunto doutra liga moi diferente á do Ensino que sigue na 13ª posición e acumula xa seis derrotas consecutivas.
Se en xornadas previas o Durán Maquinaria Ensino plantoulle cara ao seus rivais ata o último cuarto, nesta ocasión so aguantou un asalto. O primeiro envite rematou cun 17-14 e coas galegas no partido.
De feito, o conxunto lucense chegou a estar por diante no marcador en momentos puntuais deste período. Pero no segundo, un parcial de 20-8 fala ás claras de que o conxunto que adestra Antonio Pernas non puido coa avalancha anotadora do Valencia BC.
E como non hai peor cuña ca da propia madeira, a internacional galega Raquel Carrera foi unha das ‘culpables’ de que o Ensino se afundise no electrónico ata un 37-22, resultado co que se chegaba ao descanso.
O Valencia mete a directa
Na segunda metade as diferencias entre o Valencia BC e o Durán Maquinaria Ensino aumentaron en favor das locais. No terceiro período, cun parcial de 20-12, o conxunto que adestra Rubén Burgos púxose 57-34 e co 28-16 do último cuarto o partido resolvíase cun tanteo de 85-50, 35 puntos de vantaxe para as locais que, como decíamos ao principio, son dunha liga moi distinta da do Ensino.
FICHA TÉCNICA
85) VALENCIA BC (17+20+20+28): Cris Ouviña (4), Elena Buenvida (5), Queralt Casas (13), Raquel Carrera (11), Gulich (14) – quinteto inicial -. Tamén xogaron: Ángela Salvadores (16), Leti Romero (6), Anna Kalenik (4), Laia Lamana (2), Djiu (2) e Cox (8).
50) DURÁN MAQUINARIA ENSINO (14+8+12+16): Ane Olaeta (8), Alba Prieto (4), Lorena Segura (5), Paula Ginzo (8), Roundtree (6) – quinteto inicial -. Tamén xogaron: Esther Castedo (5), Laura Aliaga (-), Lydia Giomi (12) e María Martiañez (2).
PARCIAIS: 17-14, 37-22, 57-34 e 85-50.
EQUIPO ARBITRAL: Germán Francisco Morales Ruiz, Juan Ramón Hurtado Almansa e Laura Piñeiro Amondaray.
INCIDENCIAS: Partido correspondente á 18ª xornada na Liga Femenina Endesa, disputado no Pabellón Municipal Fuente San Luis, La Fonteta, de Valencia.
