Chegou o momento das de Marín e as de Ferrolterra. O Valdetires Ferrol FSF e o Marín Futsal xa contan as horas para o gran momento no que loitarán polo ascenso. Despois de completar un segundo tramo do campionato extraordinario, ambos os dous equipos disputarán esta fin de semana a primeira eliminatoria da fase de ascenso á máxima categoría do fútbol sala feminino español, a Primeira División Feminina de fútbol sala.
O elenco departamental afronta a cita á procura do ascenso coa moral polas nubes despois de asinar a primeira praza no grupo. O Valdetires Ferrol medirase este domingo a partir das 12 horas ao Rodiles FSF, cuarto clasificado, no pavillón de Esteiro. A eliminatoria dispútase a partido único.
O Marín Futsal, pola súa banda, será o primeiro en entrar en acción. O conxunto que dirixe Raúl Jiménez, segundo na táboa, tamén terá o factor pista a favor na súa eliminatoria ante o terceiro clasificado, o UDC Txanrea KKE. A gran cita, este sábado a partir das 17 horas no pavillón da Raña.
Así é o formato da fase de ascenso á Primeira División do FutSalFem
Todos os partidos disputaranse a partido único. Naqueles partidos que ao finalizar o tempo regulamentario o resultado fose de empate, disputarase unha prórroga de dous (2) tempos de tres (3) minutos. Se despois de disputarse a prórroga persistise o empate, procederase ao lanzamento de cinco (5) penaltis, na forma estipulada nas regras de xogo FIFA.
- 1ª eliminatoria: O equipo clasificado en 1ª posición de cada un dos Subgrupos C enfrontarase ao equipo clasificado en 4ª posición, sempre do seu mesmo grupo.
- 2ª eliminatoria: O equipo clasificado en 2ª posición de cada un dos Subgrupos C enfrontarase ao equipo clasificado en 3ª posición, sempre do seu mesmo grupo.
- 3ª eliminatoria: Enfrontaranse os 2 equipos gañadores das eliminatorias 1ª e 2ª. Os 4 equipos gañadores da 3ª eliminatoria clasificaranse para a Fase Final.
Fase Final
Enfrontaranse, por orde de coeficiente, determinado polo cociente entre o número de puntos conseguidos e o número de partidos xogados.
- Semifinal 1: Xogará o equipo con mellor coeficiente contra o equipo contra peor coeficiente
- Semifinal 2: Xogará o equipo con segundo mellor coeficiente contra o equipo con terceiro mellor coeficiente
Os 2 equipos gañadores das semifinais ascenderán a Primeira División Feminina da RFEF.
Fase de Promoción
Os 2 equipos perdedores das semifinais disputarán a Fase de Promoción contra os equipos clasificados nas posicións 13ª e 14ª de Primeira División Feminina. Os equipos gañadores desta Fase de Promoción terán praza na Primeira División Feminina e os equipos perdedores terán praza na Segunda División Feminina.
