As medallistas en Toquio 2020 Susana Rodríguez Gacio e Teresa Portela foron homenaxeadas pola UVigo na Facultade de Fisioterapia. O centro conta agora con dúas aulas cos nomes das deportistas e exalumnas do centro, que foron descubertas nun acto celebrado este luns.
O cambio de denominación foi aprobado no mes de outubro pola Xunta da Facultade, nun acordo lido por Rocío Abalo, secretaria académica, na homenaxe. Ao acto tamén acudiron o secretario xeral para o Deporte da Xunta de Galicia, José Ramón Lete Lasa, a decana, Eva María Lantarón, e o reitor da Universidade de Vigo, Manuel Reigosa. Tamén estiveron presentes o alcalde de Pontevedra, Miguel Anxo Fernández Lores, e os vicerreitores do campus de Pontevedra, Jorge Soto, e de Ordenación Académica e Profesorado, Manuel Ramos.
Ver esta publicación en Instagram
Susana Rodríguez, exemplo de inclusión
Susana Rodríguez Gacio trasladou na súa intervención palabras de agradecemento “á que foi a miña primeira facultade, a miña primeira experiencia universitaria, o lugar onde coñecín persoas que hoxe son dos meus mellores amigos”.
Susana Rodríguez: “(Portela) foi desde o principio o meu exemplo a seguir no deporte galego”
A medalla de ouro en maratón na clase PTVI para persoas con deficiencia visual, lembrou a súa etapa como alumna de Fisioterapia, entre 2006 e 2009, “como un pleno exemplo de inclusión na educación universitaria”, á vez que se amosou “feliz de compartir” recoñecemento con Portela. “Foi desde o principio o meu exemplo a seguir no deporte galego”, salientou.
Teresa Portela, exemplo de constancia
No seu turno, Portela lembrou a Rodríguez Gacio “as viaxes que facíamos” desde o Centro Galego de Tecnificación Deportiva (CGTD) ás aulas da facultade, para logo definila como “todo un exemplo a seguir, como deportista e como persoa”.
Portela: “(Susana Rodríguez) é todo un exemplo a seguir, como deportista e como persoa”
“É un pracer incrible que apareza o meu nome nunha das aulas nas que cursaba materias”, sinalou Portela, quen puxo de relevo a importancia que para ela tiña formarse academicamente, algo que, lembrou, é compatible con ser deportista de elite. “Significa unha constancia e un traballo diario, pero é posible”, engadiu a piragüista, que trasladou o seu desexo de que no futuro saian destas aulas “estudantes que consigan grandes éxitos, como fisioterapeutas, como deportistas ou como o que queiran ser na vida”.
Nese mesmo senso, Rodríguez Gacio incidiu no positivo de actos como o celebrado na UVigo, “nos que se unen educación é deporte”, xa que isto implica “unir valores” e pór de relevo “que seguir á vez unha carreira deportiva e universitaria é posible”.
De feito, a atleta expresou o seu desexo de volver á facultade da UVigo como alumna, unha vez se poña en marcha o Máster en Exercicio Terapéutico e Funcional en Fisioterapia, “que para moitos fisioterapeutas e para min como médica sería un luxo poder cursar na nosa Universidade”.
Lete Lasa destacou a capacidade deportiva e académica das olímpicas
Na súa intervención, Lete Lasa destacou a capacidade deportiva e académica das dúas deportistas galegas que ao longo da súa vida, como na Grecia clásica, souberon cultivar tanto a súas destrezas físicas como intelectuais. Deste xeito, o seu currículo amosa inigualables éxitos deportivos, pero tamén éxitos académicos, que acadaron en aulas como a Magna da Facultade de Fisioterapia da UVigo que acolleu a homenaxe.
Ademais do seu Grado en Fisioterapia, Teresa Portela é diplomada en Maxisterio de Educación Física e está a estudar Ciencias dos Alimentos. Pola súa banda, Susana Rodríguez Gacio tamén é médico pola USC. Lete Lasa pediulle a ambas as dúas que non abandonen “os camiños do deporte e da educación, porque supoñen unha gran satisfacción persoal” e porque Galicia “necesítavos tanto nun ámbito coma no outro”.
Ver esta publicación en Instagram
O mandatario galego amosou do seu convencemento de que os éxitos tanto de Susana como de Teresa, seguirán producíndose como ata o de agora e que, se seguro, nos Xogos de París 2024, ambas as dúas “farán máis grande unha historia que, a día de hoxe, xa é inmensa”.
“Oxalá esas dúas escolas, a física e a académica, sigan levándovos tan lonxe como queirades. Dúas escolas fundamentais na vida e que en Galicia se fusionan no Centro Galego de Tecnificación Deportiva que sempre foi a vosa casa e que o seguirá sendo”, sentenciou.
A decana Lantarón valora ás deportistas como “exemplo”
“Hoxe é un día moi emotivo para a facultade”, recoñeceu Lantarón, que definiu as egresadas como un “claro exemplo de disciplina, seriedade, constancia, tenacidade, perseveranza e modestia”, valores que a facultade consideraba necesario “pór en valor”, co propósito de que sirvan ao alumnado “como referentes para establecer as súas metas”.
Nese mesmo senso, o reitor da UVigo Reigosa definiu a Portela e Rodríguez Gacio como “un exemplo maxistral de esforzo e excelencia” e de como a combinación de ambas permite “acadar os maiores logros”.
