Fin de semana de alegrías e penas para as xogadoras galegas da Primera División Femenina de voleibol. O CV Bruxas visitaba ao colista, o D’Elhuyar e lograba sumar unha vitoria e o Calasancias Coruña lamentou unha derrota contra un dos grandes, o Fertiberia Los Campos. O Aceites Abril CVO descansou esta xornada.
O equipo de Ames pecha o 2020 cunha vitoria. O Bruxas viaxaba á Rioja para xogar contra o D’Elhuyar que, con unha soa vitoria de dous puntos, é colista. O encontro foi máis igualado do que se prevía, atendendo á traxectoria de ambos clubs.
O colista plantoulle cara ás galegas do Bruxas
O primeiro set foi para o cadro visitante, aínda que non lle resultou nada fácil ás galegas conseguilo. Para o segundo tempo, as últimas pola cola, o D’Elhuyar, plantaron cara a un rival a priori superior e lograron levarse a segunda manga, poñendo o empate sobre o marcador. Complicábanselle as cousas ao Bruxas.
Pouco durou a igualdade e no terceiro set as visitantes volveron coller o mando do partido e xa non o soltaron. Cun 12-25 no luminoso do recinto, o partido semellaba case sentenciado para as galegas do Bruxas. A remontada aínda era posible, pero as galegas seguiron freando ás locais no último tempo e sen deixarlles opcións para puntuar. Así, as xogadoras de Ames rematan o ano con bo sabor de boca e preparadas para os novos retos que chegarán no 2021.
O Calasancias non tivo posibilidade de optar á vitoria
Distinta sorte correou o Calasancias Coruña. As herculinas recibían a un dos mellores equipos da categoría, o Fertiberia Los Campos. Ambos conxuntos chegaban a esta xornada separados por oito puntos, coas galegas na sétima posición en busca dunha vitoria que as alonxase do fondo da táboa. O rival, non era o máis propicio para conseguilo, pero no deporte e na vida, nada hai escrito.
Os dous equipos lograran unha vitoria no partido anterior e querían manter as boas sensacións acadadas para rematar a primeira volta. Con todo, o Calasancias Coruña case non tivo oportunidades de loitar polo triunfo ante o Fertiberia Los Campos que desplegou un mellor xogo sobre a cancha.
Desde o primeiro set as visitantes foron superiores, logrando un pleno de mangas, e sen deixar que as galegas se achegasen no luminoso. Aínda que as coruñesas do Calasancias saíron máis centradas á pista no inicio do partido, as asturianas non tardaron en coller o ritmo e facerse co encontro.
As galegas finalizan a primeira volta na metade da táboa
Con esta xornada finaliza a primeira parte da competición e o fai cos tres conxuntos galegos repartidos polo medio da táboa e con puntuacións diversas.
O Aceites Abril é o equipo de Galicia que mellor xogou nestes partidos. Con seis vitorias, cinco delas de tres puntos, as ourensás finalizan o ano na cuarta posición, a dous puntos do Curtidora e a seis das líderes, o CV Oviedo.
O seguinte é o Bruxas, que aínda ten que disputar o encontro contra as primeiras da lista o próximo mércores, 23 de decembro. Polo de agora, as galegas ocupan a sexta posición, con 13 puntos, sumando 14 sets a favor e 11 en contra.
Finalmente, está o Calasancias Coruña. As herculinas son as que ven perigar máis a súa permenencia na categoría, a sete puntos das colistas, con seis derrotas de nove partidos xogados.
A competición reaunarase na Primeira División Feminina do Voleibol estatal o vindeiro sábado 16 de xaneiro, xa no 2021. Para esa fin de semana está prevista disputa do duelo entre galega que enfrontará ao Calasancias e o Bruxas, así como a visita do Aceites Abril ao Curtidora Universidad de Oviedo en terras asturianas.
