Unha gran 1ª metade non salva ao Ensino da derrota (52-77)

O pulso do Durán Maquinaria Ensino ante o Valencia BC, un dos equipos máis potentes da competición, durou un asalto, o da primeira parte. Un mal terceiro cuarto marcou o desenlace do encontro, no que as lucenses sufriron unha derrota 52-77 e o susto dun duro golpe de Laura Aliaga nos últimos minutos.

Dominando claramente desde a liña de triplo e cunha defensa unida que mantiña a raia ás taronjas, as lucenses de Carlos Cantero tiveron posibilidades de gañar na primeira parte. Todo cambiou na segunda cando, segundo o adestrador, “os árbitros xa non nos deixaron xogar como estabamos xogando e cambiaron o criterio completamente sen saber por qué”.

O resultado final foi unha derrota na casa, que mantén ao Ensino na sétima posición, a falta dunha xornada para finalizar a primeira fase da Liga Feminina Endesa.

Dúas caras da moeda para o Ensino

O partido comezou cun conxunto local motivado, que saltaba á súa pista disposto a dalo todo. Esta actitude permitiulle asinar algúns dos seus mellores minutos no primeiro tempo do duelo co Valencia.

O primeiro golpe foi das visitantes, pero as lucenses enseguida tomaron o control do balón para situarse por diante. O acerto anotador de xogadoras como Laura Aliaga, Chatrice White e Alba Prieto forzaba ás valencianas a esforzarse por manter o ritmo e non descolgarse. Así, cunha lixeira vantaxe dun punto (13-12), remataba o primeiro cuarto.

O segundo serviu para que o Ensino se desmarcase das rivais, con Vega Gimeno e Aleksandra Stanacev liderando o cadro local. A intensidade na cancha e o ritmo elevado poñía ás de Cantero con posibilidades de levarse a vitoria, mentres que o Valencia seguía ás galegas ao remolque. O acerto desde o triplo, moi superior nas de Lugo, permitía que para o descanso a vantaxe fora precisamente de tres puntos sobre as visitantes (34-31).

Pero o panorama mudou por completo á volta de vestiarios. O Valencia volveu coas enerxías renovadas e aproveitou cada erro das galegas para non só recuperar o terreo perdido, senón conseguir situarse por riba.

As de Cantero, marcadas por un cambio nos criterios arbitrais segundo o propio adestrador, estaban bloqueadas e non eran capaces de recuperar a eficacia anotadora. Así, as lucenses só foron quen de sumar 8 puntos ao seu marcador, mentres que as visitantes anotaban 20, dandolle a volta ao resultado e logrando unha distancia importante para o último cuarto.

Neste último tempo, o Ensino tiña xa pouco que facer. As galegas seguiron loitando e presionando, ofrecendo unha mellor cara que no anterior cuarto, pero unha técnica a Gimeno a falta de seis minutos sacounas por completo do duelo. O resultado final reflectiu o desnivel de poder na pista e a distancia cada vez maior entre os equipos, cun final 52-77 a favor das valencianas.

Podes revivir o partido nesta ligazón.

O golpe de Aliaga quedou nun susto

Un dos exemplos máis claros dos que fala Carlos Cantero no relativo á arbitraxe foi unha das últimas accións do partido. Laura Aliaga estaba saltando para realizar un tiro cando foi placada por unha xogadora rival, facendo saltar as alarmas no Ensino.

“Non foron capaces de pitar falta, cando está tipificado como antideportiva que se metan debaixo dunha xogadora cando fai un tiro”, declararía o técnico no postpartido. A 12 lucense tivo que ser trasladada ao hospital, pero as probas médicas foron satisfactorias e todo quedou nun susto.

Pruebas realizadas y todo en orden 🙏🏽. Creo sinceramente que era innecesaria la acción, gracias a todos por los mensajes🥰.
A seguir dando guerra 😉. pic.twitter.com/cyRnkLqbvt
— Laura Aliaga Romero (@laura_aliaga12) March 22, 2021

En poucas palabras, Carlos Cantero mostrouse “moi descontento coa arbitraxe da segunda parte”, pero quixo darlle os parabéns “ao meu equipo pola primeira parte e o esforzo realizado no partido”.

Galería fotográfica do Ensino – Valencia

1 de 8

- +