Coa cuarta xornada da Spanish Softball League, o CBS Cambre suma unha vitoria e unha derrota. Os dous partidos foron contra as vascas do OBB Bizkorrak, un conxunto completo que puxo ás cambresas contra as cordas. O resultado do primeiro duelo foi un 6-5 a favor das locais e o segundo un 2-9 a favor das visitantes.
Desde os primeiros intres da xornada, o Cambre puido vivir en primeira persoa o potencial do cadro vasco. O Bizkorrak colleu vantaxe no inicio do primeiro partido disputado en Acea de Ama, cun 0-4 ao seu favor. Porén, as galegas reaccionaron a tempo e reaxustaron a súa defensa para frear ás rivais. Cun bateo oportuno, as locais souberon provocar fendas na defensa contraria, aproveitando os erros para iniciar a remontada. Así, cambiaron o marcador ao 6-4 a favor.
Na última entrada, as xogadoras do Bizkorrak seguían presionando, polo que se viviu a tensión ata os últimos minutos. Malia recibir unha última carreira das vascas, a defensa do Cambre impúxose para pechar o partido nun emocionante 6-5.
Para o segundo encontro do día, as galegas non tiveron a sorte ao seu carón. As claves deste segundo duelo estiveron na potencia do bateo visitante e nos erros ocmetidos polas locais. De novo, o Bizkorrak púxose á cabeza, pero desta vez o plantel do cadro galego non foi quen de remontar o resultado. O segundo partido rematou cun 2-9.
O rival na seguinte xornada para as coruñesas será o Capitalinas, polo que as galegas se desprazarán a Las Palmas de Gran Canaria.
