O Autos Cancela Zalaeta pecha unha tempada irregular cunha derrota (3-0) ante o CV Sestao, un dos equipos máis sorprendentes da Superliga Femenina 2 (SF2). As vascas conseguiron finalizar na cuarta posición, a mellor da súa historia.
Tras este resultado da última xornada, as galegas rematan a tempada na sexta posición, logrando salvarse na penúltima fin de semana de competición. Cun balance de seis vitorias de tres puntos, dúas de dous, tres derrotas dun punto e nove de cero, acumulan un total de 25 puntos. O RGC Covadonga manexa os mesmos números, pero as coruñesas rematan unha posición por riba das asturianas ao ter estas 3 sets menos en contra.
O partido final do Zalaeta
As herculinas viaxaban ata Sestao coa tranquilidade de estar salvadas e sen nada en xogo, pero con ganas de rematar a tempada con grandes sensacións. Porén, o seu rival está a vivir un curso doce e así o rematou en casa, pero sen afección.
O Sestao dominou o xogo desde o primeiro minuto, sendo letais nos aces. No primeiro set, as vascas impuxéronse ao Zalaeta sen moita complicación nos ataques, aínda que o partido estaba máis igualado na recepción e o saque. Con Nerea Izaguirre como principal anotadora no bando local e Alba Quirós no visitante, o primeiro tempo rematou nun 25-21.
Para a segunda manga, as herculinas perderon enerxía e concentración. O resultado deste set foi un 25-18, no cal 8 dos puntos obtidos polas vascas foron a raíz de erros nas galegas. O ataque estivo máis equilibrado nesta manga, sendo as coruñesas incluso superiores nos bloqueos. Porén, Oihane Paskual seguiu aumentando a distancia do Sestao, mentres Andrea Rivas intenaba recortar distancias para o Zalaeta.
Cun 2-0 en contra, e un conxunto galego que foi de máis a menos, nada indicaba unha posible remontada. No terceiro set o Zalaeta foi capaz de anotar máis desde o saque directo e case igualar ás rivais en ataque, pero os erros seguen a ser a materia pendente.
Nesta manga, o Sestao foi quen de sumar 13 puntos deste xeito, mentres que as galegas anotaron só 6. O 25-12 marcaba o punto final ao último partido desta tempada, no que o Zalaeta remata na zona morna da táboa.
FICHA TÉCNICA
3) CV SESTAO: Izaguirre, Briz, Gutierrez, Paskual, Ruiz e Verweij – sexteto inicial -. Tamén xogaron: Tejedor (líbero), Lorenzo, Iglesias e Ugalde.
0) AUTOS CANCELA ZALAETA: Santos, Gómez, Quirós, Rivas, Guzzi e Forteza – Ferreño – sexteto inicial -. Tamén xogaron: Lorenzo (líbero), Figueroa, González, Sánchez (líbero) e Carvajal.
PARCIAIS: 25-21, 25-18 e 25-12
ÁRBITROS: Correa de Souza e Gálvez.
INCIDENCIAS: Partido correspondente á penúltima xornada 22ª da Superliga Feminina 2 da RFEVB, disputado no pavillón polideportivo La Benedicta Sestao.
