Este San Valentín, o Dépor ABANCA ten que ser, máis que nunca, un grupo que se mova sobre o campo, que pense, e que xogue con #UnÚnicoLatido. Ese lema de As Nosas deportivistas, que lembra a súa fortaleza como bloque e que xuntas son máis fortes, será unha das claves para que as galegas tiren o máximo partido do seu cruce en Abegondo co Real Betis Féminas. A cita está fixada para as 13:30 horas de mañá domingo, 14 de febreiro, e será transmitida por Gol e dirixido pola colexiada canaria Xiomara Díaz.
O Dépor ABANCA está a tan so catro puntos dos postos de salvación. Acariñan o ansiado respiro que lles daría afrontar os partidos sen a presión de verse no grupo de cola. Pero e que xustamente iso é o que lle acontece ao seu rival desta xornada. O Real Betis Féminas, que estaba chamado a outras loitas esta tempada, vese sumido nos últimos postos da clasificación, por debaixo das deportivistas e acuciado pola necesidade de salvarse. De feito, as verdibrancas son o faroliño vermello da táboa clasificatoria. Teñen dez puntos, un menos cas galegas.
O adestrador do Dépor ABANCA, Manu Sánchez confirmou en rolda de prensa telemática emitida desde a Cidade Deportiva de Abegondo que segue a ser baixa tamén neste partido a futbolista colombiana Carolina Arbeláez coa que están traballando os médicos sen prazos para a súa volta. “Ela está con moi bo ánimo e predisposición. Esperamos tela canto antes”, explicaba o adestrador que tamén advertiu que hai xogadoras “con molestias, aínda que non serán importantes de cara a este encontro”.
#AsNosas convocadas para a unha nova xornada de #PrimeraIberdrola, o #DéporABANCABetis de mañá ás 13:30 h. na Cidade Deportiva de Abegondo (📺 @Gol) pic.twitter.com/sD57mk0YbA
— RC Deportivo (@RCDeportivo) February 13, 2021
Vinte convocadas no Dépor
Deste xeito, a convocatoria deportivista está conformada polas xogadoras: Esther Sullastres, Noelia Villegas, Stephannie Blanco, Iris Arnaiz, Michelle, Athenea del Castillo, Alba Merino, Kika, Gaby, Noe Bermúdez, Helena, Bedoya, Lady Andrade, Peke, Ainoa Campo, Cris Martínez, Carlota, Patri López, Eva Dios e María Figueroa. A canteirana Eva Dios recibía esta mesa semana a chamada da Selección Española Sub-19 para adestrar en Marbella co combinado estatal.
Manu Sánchez, entrenador do RC Deportivo ABANCA: “Penso que será un partido aberto de poder a poder”.
Para Manu Sánchez, o enfrontamento co Real Betis Féminas é “un partido importante como vai ser o seguinte, e o seguinte, e o seguinte. O noso obxectivo é conseguir o tres puntos e seguir o que parece unha boa liña de crecemento”. O preparador das galegas agarda un partido “competido, aberto” e considera que as verdibrancas “converténdose nun equipo moito máis eficaz”, logo da chegada de Juan Carlos Amorós.
Pese a ter máis puntos que as andaluzas, o preparador das coruñesas non se confía en absoluto diante do Betis. Nese sentido, avisa: “Son perigosas porque veñen nun bo momento cun bo resultado ante o Sporting Huelva e un bo partido ante o FC Barcelona. Hai que estar atentos. A ver como está a climatoloxía. Pero penso que será un partido aberto de poder a poder”.
Manu Sánchez: “É un partido importante como vai ser o seguinte, e o seguinte”
O Real Bétis Féminas, no que milita a arousana Mari Paz Vilas, está colista. As verdibrancas recuperan efectivos para este cruce en terras galegas. Juan Carlos Amorós terá como dúbidas ata última hora a algunhas xogadoras, pero sábese que regresa á convocatoria Ana Hernández, tras varias semanas fóra das canchas de xogo. O adestrador das andaluzas tamén recupera con respecto ao encontro contra o FC Barcelona a Dorine, Rosa Otermín e Rosa Márquez.
A convocatoria verdibranca están as seguintes futbolistas citadas por Juan Carlos Amorós: Méline, Medina, Ana G., Laura G., Ana Hernández, A. Salvador, Altuve, Mari Paz, Nuria, Bea Parra, Dolan, R. Otermín, Rosa M., Dorine, Perarnau, Paula P.R., Ángela Sosa e Valle.
💚🤍💚
¡Nuestra convocatoria para el #DéporRealBetis!
¡Vuelve @AnitaH978! 🙌🏼#BetisFéminas #PrimeraIberdrola pic.twitter.com/ZZDw0AcGM7
— Real Betis Féminas (@RealBetisFem) February 13, 2021
Amorós: “O Dépor ten dinamita arriba con Peke e Athenea”
Juan Carlos Amorós, adestrador do Real Betis Féminas, fala do Dépor ABANCA como un “rival directo” e do partido de mañá domingo como “unha final importantísima na que imos tentar conseguir os tres puntos“.
O técnico considera que o seu equipo está “nun mellor estado psicolóxico. A vitoria co Sporting Huelva deunos moita forza. As xogadoras están moi unidas, teñen claro o obxectivo, saben que é unha final para nós e están totalmente concienciadas de ir a Coruña a conseguir os tres puntos”.
Sobre o maratón de partidos desta semana, Amorós explicaba que fisicamente “estamos a mellorar”, pero admite a dificultade que agacha tanto partido logo dun tempo de menor ritmo. “É certo que son tres partidos nunha semana e sobre todo con dúas viaxes moi longas a Barcelona e A Coruña, e cun ritmo competitivo ao que non estabamos afeitas (polas cancelacións e similiares). Ao final hai que buscar o máximo rendimento. Ogallá que deramos coa tecla á hora de dar descansos”, anhela o adestrador bético que lembra que o equipo ten, ademais, lesionadas de longa duración.
Do Real Club Deportivo ABANCA dixo Juan Carlos Amorós que as branquiazuis teñen “dinamita arriba con Peke e Athenea. Que son a súa referencia. Tentan buscalas dun xeito directo. Están mellorando. Non recibiron goles nos últimos dous partidos e iso fala do traballo defensivo que fan. Teremos que usar as nosas armas, que son moitas. Aproveitaremos as nosas forzalezas e explotar as súas feblezas, que tamén teñen algunha, para así acadar os tres puntos”.
Este cruce correspondente á decimocuarta xornada da Primera Iberdrola celebrarase na Cidade Deportiva de Abegondo a porta pechada, por mor das restricións que a Xunta de Galicia ten vixentes na nosa comunidade para pórlle freo á curva de contaxios da COVID-19. Trátase dun partido adiado que tiña que terse disputado o pasado 10 de xaneiro. Se consegue imporse ao Betis, o Dépor ABANCA podería chegar a escalar ata dous postos na clasificación.
