“Un único latido” foi o grito de guerra de As Nosas deportivistas na tempada do seu ascenso á Primera Iberdrola. Facía referencia ao seu funcionamento como bloque. A frase, que agacha moito sentimento e traballo de grupo, xurdiu das mentes da fisioterapeuta Andrea Seijo e a preparadora física Lucía Piñeiro. Aqueles eran bos tempos, pero agora, cando veñen mal dadas, o único latido segue a latexar acompasado nos peitos das futbolistas branquiazuis.
Esta non está a ser unha boa tempada para o Dépor ABANCA na Liga Iberdrola. En seis xornadas disputadas, as de Manu Sánchez aínda non conseguiron puntuar. Unha competición marcada polo COVID-19, que truncou a fin da tempada anterior, cun nivel moi alto e as baixas de xogadoras como Peke, Cris ou Kenni e agora a do adestrador das porteiras, Fran Martínez ‘Pana’, están supoñendo máis pedras no camiño do clube pola permanencia. Con todo, o equipo móstrase unido ante a adversidade baixo o seu lema desde hai xa varias tempadas: “un único latido”.
Esta semana as futbolistas do Dépor ABANCA teñen unha breve pausa debido ao adiamento do encontro contra o Rayo Vallecano por un caso positivo detectado entre as xogadoras madrileñas. Un descanso que desde o equipo esperan aproveitar para pensar, analizar a mala situación actual e tomar as decisións necesarias. E para seguir traballando: Manu Sánchez citou ás xogadoras ao día seguinte do partido contra o Sevilla FC e desde este martes comeza a preparar xa o choque fronte ao Levante UD do sábado.
Porén, tanto xogadoras como adestrador coinciden en que a solución para finalizar esta mala racha está clara: a unidade do equipo. Porque o Dépor ABANCA non está tendo bos resultados, pero sen dúbida o vestiario está comprometido e disposto a loitar polas cores. E así o demostran tanto no campo como en redes sociais.
Entre as actuais xogadoras branquiazuis está claro a mensaxe: “Quen non sume, que non reste”. Este chío, publicado pola centrocampista Iris Aranaiz, foi apoiado por varias das súas compañeiras, entre elas Stephannie Blanco, Peke, Noe Bermúdez e Carolina Arbeláez.
#UnÚnicoLatido https://t.co/TAYcbgszkR
— Peke (@ainizebarea) November 4, 2020
Unha vez do Dépor ABANCA, sempre do Dépor ABANCA
Exfutbolistas do conxunto herculino tamén se sumaron a esta mensaxe de unión, proba da paixón que senten polas cores malia non estar ligadas xa ao clube. A ex do Dépor ABANCA, Miriam Ríos tamén citou o chío de Iris. A defensa, agora na UD Tacuense, recalcou noutro chío o inxusto deste deporte e o seu apoio ao equipo desde a distancia.
https://twitter.com/miriamrios_7/status/1325534754121379841
Outras ex xogadoras como Tere Abelleira e Nuria Rábano tamén quixeron sumarse ás mensaxes de apoio que están a recibir as futbolistas do conxunto coruñés, transmitíndolles a confianza que teñen nelas malia os malos resultados desta tempada.
https://twitter.com/teresabelleira/status/1325548942508122115
Unha fe que comparte nas súas redes María Miralles, agora no Real Oviedo. A porteira coincide na mala sorte que está a acompañar ás deportivistas e na importancia do traballo e unión para superar esta mala racha.
https://twitter.com/Mirallosa_/status/1325566270067052546
Un único latido para loitar pola categoría
O adestrador, Manu Sánchez, admitiu en rolda de prensa que o equipo precisa arranxar xa os erros para os próximos encontros, pero a súa confianza no plantel é plena.
O técnico insistiu nas súas declaracións que aínda é cedo para falar do descenso e que o obxecitvo do Dépor ABANCA é loitar pola permanencia. Segundo Sánchez, os equipos de verdade vénse nos momentos difíciles, como o que está a vivir o Dépor. Un discurso que tamén compartiu no seu perfil de Twitter onde lanzaba tamén unha mensaxe de apoio ao Fran, adestrador de porteiras que ven de lesionarse.
En los momentos difíciles es donde se ven los equipos de verdad
Estas dos fotos juntas lo explican perfectamente
Ya os dije una vez que deportivamente seréis eternas para el Dépor pero en lo personal no encuentro adjetivos
Seguimos!!#UnÚnicoLatido pic.twitter.com/UH1owSqVIT— Manu Sánchez (@ManuSanchez04) November 9, 2020
Nas pasadas semanas, pero especialmente nestes últimos días, baixo a etiqueta #UnÚnicoLatido en Twitter, a afección deportivista e compañeiros do equipo masculino, como Claudio Beauvue, mostraron o seu apoio ás xogadoras da Liga Iberdrola.
Este único latido segue a latexar con forza, e será a clave para manter vivo a un Dépor ABANCA ao que non acompaña a sorte e que loita, pero non se afunde. A derrota sobre o pitido final contra o Sevilla FC o pasado domingo foi un golpe duro para as branquiazuis.
A ilusión de xogar no Estadio Municipal ABANCA – Riazor rematou cun sabor amargo por outra xornada sen puntuar, pero as xogadoras xa teñen a mirada no seguinte encontro, que será o sábado 14 de novembro ás 16:00 horas.
https://twitter.com/ainoacampo/status/1326133314319773696
Manu Sánchez: “Non é normal que nestes primeiros seis partidos non acadásemos ningún punto”
