Un século de atletismo galego (1921-2021)

Esta fin de semana é unha data moi especial para a Federación Galega de Atletismo (FGA). Fai nada menos que un século que se constituía esta entidade. O seu cometido sería desde entón “a organización, regulación e xestión dun deporte que xa contaba con notoria importancia e que viña de establecer a creación apenas dous anos antes, da Real Federación Española de Atletismo”, explican desde a propia FGA.

Lembran desde a FGAque o ano de 1921 “foi a nivel internacional un ano que marcaba o comezo dunha década na que comezaba a percibirse no ambiente social un cansazo de desgrazas, e unhas ganas xeneralizadas de ilusión, esperanza e optimismo. O mundo acababa de saír tanto dunha gran contenda mundial, como dunha gran pandemia,  e estaba desexoso dun novo modelo de vida e sociedade. Con todo, as axitacións sociais e políticas estaban á orde do dia marcando a axenda dun país, España e dunha futura comunidade autonóma, Galicia de maneira importante”.

Neste contexto no que se mixturaban axitación, de cansazo e de optimismo organizouse no Campo de Coya de Vigo, no ano 1921 o primeiro Campionato de España en Galicia de Atletismo sendo Guillermo Moreira do Comesaña S.C. na proba dos 400 m. o primeiro atleta galego en conseguir un título nacional.

Con anterioridade a esa época, existía xa un puxante tecido atlético, como consecuencia do cal no ano 1915, creábase o decano dos clubs galegos, o Comesaña S.C. Xunto a el contaban con actividade o Real Fortuna, o Xermania, o Español ou o Real Vigo, por citar só algúns.

Enrique Bantle, primeiro presidente da FGA

Con todos estes precedentes nos salóns da Sociedade Coral de La Oliva, un 27 de marzo e sendo as 21:00 horas, Manuel de Castro, Enrique Banlle e Joaquín Freijeiro, como persoas encargadas de levar a cabo os preliminares para a constitución da Federación Galega de Atletismo, e Fernando Montero, Antonio Cuiñas, e Antonio Teijeiro como delegados de clubs, poñen en vigor os estatutos da Federación Galega de Atletismo pola que se nomea como primeiro presidente da devandita Federación Galega de Atletismo (FGA) a Enrique Bantle. Tamén no ano 1921, Enrique Bantle figura como presidente da Federación Galega de Fútbol.