O Viaxes Amarelle FSF recuperou o primeiro dos partidos aprazados contra un rival directo, visitando a cancha do AE Penya Esplugues, pero non conseguía o triunfo. Con todo, as coruñesas sumaron un punto froito do empate 1-1 co que rematou o choque. A colleita sabe a pouco por tratarse dun rival directo que, tras a disputa deste choque, queda un posto por riba das galegas.
As galegas empezaron con máis intención de xogo ofensivo, pero as locais adiantáronse ao final da primeira parte, presentando unha actitude máis defensiva na segunda parte. Foi aí onde as herculinas tomaron máis protagonismo e tiveron varias ocasións moi claras, pero que se resolveron cun só gol a favor. Eso permitiu que o partido finalizase con reparto de puntos, tras mostrar o luminoso un resultado de 1-1.
O partido empezaba cun Viaxes Amarelle FSF que tiña o balón e xogábao con criterio para crear o perigo necesario sobre a portaría contraria, mentres que as locais optaban por unha defensa en media cancha, para tratar de sorprender á contra. Pero co avance do partido, ningún dos dous equipos conseguía porse por diante no marcador, nin xerar ocasións o suficientemente claras de perigo.
Xa na medianía do primeiro período, o AE Penya Esplugues optou por subir a súa liña de presión para impedir a saída de balón cómoda das herculinas, aínda que tampouco conseguían con iso porse por diante.
Deste xeito ían transcorrendo os minutos o partido igualábase. A falta de menos de dous minutos para o tempo de asueto, o AE Penya Esplugues roubaba o esférico en media cancha e armaba unha contra que finalizaba Berta Velasco cun potente disparo exterior, axustado ao pau contrario da porteira. Este disparo fixo subir o 1-0 ao marcador, un resultado co que o partido se iría ao descanso.
Logo do paso por vestiarios, o partido volvía a unha dinámica similar á do inicio do partido. Víase a un AE Penya Esplugues que se atopaba cómodo en tarefas defensivas, coa vantaxe dun gol no marcador. Pero as herculinas necesitaban facer gol para igualar a contenda e tratar de darlle a volta ao marcador; e neste punto mostrou un xogo máis atrevido e empezaron a chegar as ocasións sobre a portaría das catalás. Con todo, a falta de definición no último pase ou os paus noutra ocasión, impedían que o partido se igualase no luminoso.
As galegas nin se rendían, nin baixaban o ritmo. Así, a falta de 6 minutos para o final, Sofía Rodríguez cun potente disparo de 8 metros puña o 1-1 no marcador.
As herculinas querían a vitoria, do mesmo xeito que as locais, que subiron as súas liñas nos últimos minutos; pero ningunha das dúas escuadras foi capaz de desfacer o empate, e chegou o asubío final coa repartición de puntos
Foi o desta xornada recuperada, un partido moi traballado do cadro herculino, que soubo levar o peso do partido en gran parte do encontro e conseguir bos repregamentos defensivos nas contras que conseguían xerar as locais. Aínda que cunha segunda parte con ocasións máis claras, e algún balón ao pau, o partido terminou cunha repartición de puntos ante un rival directo, que sabe a pouco. Non hai que esquecer que este resultado mantén á AE Penya Esplugues, rival directo, un posto por encima das galegas na clasificación, a falta dun partido para terminar a primeira fase da competición.
Seguinte rival, o CD Leganés FSF
Tras a disputa deste novo encontro da competición regular, o Viaxes Amarelle FSF regresa nos próximos días aos adestramentos para afrontar un encontro complicado duelo fronte a un rival da zona media da táboa na Primeira División Nacional Feminina de fútbol sala. Será recuperando o encontro aprazado da duodécima xornada do subgrupo A contra o CD Leganés FSF.
As herculinas recibirán as madrileñas o vindeiro sábado 20 de marzo ás 18:00 horas no Pavillón Municipal de Novo Mesoiro (A Coruña).
FICHA TÉCNICA
1) AE PENYA ESPLUGUES: Raquel, Martita, Celia, Berta Velasco e Clara – quinteto inicial -. Tamén xogaron: Collado, Irina, Pilar, Laia, Roser, Beth, Belén e Muni.
1) VIAXES AMARELLE FSF: Leti Rojo, Cris Lourés, Lau Doce, Anna Escribano e Candela Soria – quinteto inicial -. Tamén xogaron: Patri Corral, María Gómez, Sofía Rodríguez e Yaiza.
GOLES: 1-0 Berta (min. 18); 1-1 Sofía Rodríguez (min. 34).
Árbitros: Bernardo Simon Benet e Francesc García Donas Salvador do Colexio de Árbitros de Cataluña. Mesa: Sergio Rodríguez Aguado do Colexio de Árbitros de Cataluña. Amosaron cartón amarelo a Diego do Viaxes Amarelle FSF.
INCIDENCIAS: Partido aprazado correspondente á 11ª xornada do Subgrupo A da Primeira División Nacional Feminina de Fútbol Sala disputado no C.E.M. Les Moreres (Esplugues de Llobregat).
