Ter un novo estadio de atletismo é unha vella arela desta disciplina na cidade da Coruña. Hoxe, o Concello instaba a Xunta de Galicia a camiñaren da man para que a xente do atletismo dispoña de instalacións na cidade herculina. “Sería conveniente poñérmonos a traballar conxuntamente para que esta cidade teña o estadio que o atletismo coruñés demanda e merece”, sinalou a concelleira de Deportes, Mónica Martínez, no transcurso da comisión informativa de Deportes realizada na cidade herculina.
A edila lembrou tamén que a Escola de lanzadores da Coruña leva dez anos no estadio de atletismo da Facultade de Ciencias da Actividade Física e do Deporte (INEF): “Ningún dos gobernos anteriores conseguiu blindar a súa permanencia no INEF, ubicado en Oleiros, malia ser un núcleo de alto rendemento onde adoitan adestrar grandes atletas de todo o mundo”.
Neste punto, o departamento de Deportes coruñés a segura que recibiu nestes meses o director técnico da Escola de lanzadores, Raimundo Fernández, e organizou unha xuntanza en novembro a catro bandas entre Concello da Coruña, INEF, Federación Galega de Atletismo e Escola de lanzadores para iniciar contactos de cara a traballaren no convenio que esta entidade leva anos demandando. “E por ese camiño seguimos”, indicou Mónica Martínez.
No decreto 165/2020, do 17 de setembro, polo que se regula o deporte de alto nivel, de alto rendemento e de rendemento deportivo de base de Galicia, a Xunta define o alto rendemento deportivo como a práctica deportiva que aínda non pode ser cualificada de alto nivel, pero que ten condicións que indican que vai camiño de selo. Tamén fala do rendemento deportivo de base como unha etapa de desenvolvemento e perfeccionamento previo ao alto rendemento ou o alto nivel, características que reúne esta escola de lanzadores coruñesa.
