Unha vez máis, un mal primeiro cuarto supón un obstáculo moi difícil a superar paras as xogadoras do Durán Maquinaria Ensino. Frouxas en defensa, as galegas non souberon remontar ao Lointek Gernika e perderon por un 66-78.
O 2021 estreábase no Pazo dos Deportes de Lugo cun partido do cadro dirixido por Carlos Cantero acollendo a todas as socias residentes na provincia. O rival, un equipo duro, que logrou rematar a primeira volta en cuarta posición e acumulaba dúas vitorias máis que as lucenses: o Lointek Gernika Bizkaia.
A tónica dos partidos anteriores prometía un partido complicado, pero adsequible para as galegas, xa que as vascas chegaban dunha racha de tres derrotas consecutivas. Finalmente o Ensino pagou demasiado caro o mal inicio do duelo e as visitantes lograron romper coas sensacións de derrota.
Defensa débil e pouco acerto fronte á canastra
As xogadoras de Cantero saíron desconcentradas á pista, e o Lointek Gernika aproveitou para facerse co dominio do balón e do encontro. A feble defensa galega obrigou ao técnico lucense a solicitar un tempo morto para intentar revertir a situación.
As indicacións non foron suficientes e o Ensino seguía sen saber frear ás vascas, mentres que Hempe e Gimeno non tiñan ocasións de tiro. A isto engadiuse o acerto do Gernika ante o taboleiro. Nos primeiros dez minutos, as visitantes soamente fallaron dous tiros de campo.
Para o segundo cuarto, o ritmo do partido cambiou por completo e as locais comezaron a facerse co control do duelo en casa. A entrada ao parqué de Chatrice White refrescou o xogo lucense e as de Cantero lograron asinar un parcial 10-0, forzando a Mario López a pedir un tempo morto para o Gernika.
Carlos Cantero: “O porcentaxe de acerto non estaba sendo moi bo e quizais abusamos un pouco do triple”
Os roles case se invertiron por completo, xa que desta vez eran as visitantes as que fallaban fronte ao aro, sen marcar nos últimos sete minutos, mentres que o Ensino lograba duplicar en puntos ás rivais. “Estivemos ben e as deixamos a seis puntos e melloramos en defensa, o que mantivemos o resto do partido. Pero o porcentaxe de acerto non estaba sendo moi bo e quizais abusamos un pouco do triple”, analizaba Carlos Cantero. Así chegou o descanso, cun 25-36 no electrónico.
Tras o paso por vestiarios, as forzas de ambos conxuntos equilibráronse máis. O dúo Hempe-White permitía ás locais seguir sumando puntos, mentres que Cornelius e Roundtree nas visitantes mantiñan o pulso. Cun vaivén de puntos chegaba o cuarto final, cun 45-55 no marcador.
A cada minutos que pasaba o Ensino reaccionaba mellor. Tres triples consecutivos no tempo final colocáronnas a tres puntos das trivais. O acerto desde a liña de tres pasou de White a Stanacev, que non fallou ningún dos catro que tirou.
Nos últimos minutos, parecía que a remontada era posible. A catro minutos da bocina, as lucenses conseguían situarse a só dous puntos das súas rivais, pero o tempo restante non foi suficiente para lograr salvar o partido.
“Nos minutos finais elas estiveron mellor nos detalles dos seus conceptos e xogadoras como Bjorklund anotaban cada tiro que realizaban”, sinalaba o adestrador lucense. Así, o cadro de Cantero perdeu o primeiro duelo do 2021.
Unha primeira ocasión de vitoria perdida, pero que non frea ás lucenses que xa teñen a mente posta no seguinte partido. “Intentamos pelexalo. O primeiro cuarto saíu mal, os obxectivos que queríamos non estaban saíndo, pero logo demostramos desde o segundo cuarto que podíamos facer as cousas ben. Agora a pensar no partido de Canarias, que é moi importante e no que necesitamos a vitoria si ou si”, declaraba a 12 do Ensino, Laura Aliaga, ao finalizar o encontro.
A seguinte cita será o sábado 9, ás 20:00 horas, contra o SPAR Gran Canaria, décimo terceiro clasificado na Liga Feminina Endesa.
FICHA TÉCNICA
66) DURÁN MAQUINARIA ENSINO: Merritt Hempe (10), Aleksandra Stanacev (16), Vega Gimeno (6), Laura Aliaga (5) e Van den Adel (8) -cinco inicial-. Tamén xogaron: Chatrice White (15), Alba Prieto (6), e Nina Bogicevic (-).
78) LOINTEK GERNIKA BIZKAIA: Laura Cornelius (11), Milica Ivanovic (15), Deanne Bjorklund (20), Yvette Roundtree (10) e Nadia Gomes (9) -cinco inicial-. Tamén xogaron: Nogaye Lo Sylla (7), Belén Arrojo (4), Paula Ginzo 8-), e Itziar Ariztimuño (2).
PARCIAIS: 13-30, 12-6, 20-19, 21-23.
ÁRBITROS: Antonio Sacristán, Alberto Lázaro e Sara Pelaéz.
INCIDENCIAS: Partido correspondente á 19ª xornada de Liga Femenina Endesa, disputado no Pazo dos Deportes de Lugo.
