O Dépor ABANCA sumou unha nova derrota lonxe de Abegondo, desta vez en Valladolid, onde as branquiazuis xogaban ante o CD Parquesol.
Un gol temperán do equipo local castigou ás galegas, que volveron a casa coas mans baleiras. O encontro estivo marcado polo vento e o frío no que as xogadoras dirixidas por Miguel Llorente fixeron méritos para traerse algo positivo.
Golpe inicial para o Dépor ABANCA
Nada facía presaxiar o que ao final ocorreu despois de ver os primeiros minutos de xogo, nos que o dominio coruñés foi esmagador. María Ruiz, no minuto 4, disparou de lonxe a mans de Jimena. No 7, Aroa enganchou un balón á media volta coa súa bota esquerda que se perdeu moi preto do pau.
Con todo, no minuto 8, o conxunto local abriu o marcador no seu primeiro achegamento. Unha internada pola dereita concluíu cun disparo de Charle que desviou co pé Inés Altamira, enganando por completo a Ana Vales, que nada puido facer para evitar o tanto.
Non tardou nada o Dépor ABANCA en responder, cun balón á área para María Ruiz pero o seu control fóiselle un pouco longo e acabou en mans da porteira.
O CD Parquesol tratou de aproveitar o forte vento a favor buscando en longo as costas da defensa coruñesa, pero só achegouse ao gol nun libre directo ao cuarto de hora que se marchou fóra.
O Dépor ABANCA reclamou un penalti sobre Ainhoa Marín pouco despois, no minuto 17. No 24, Eva Divos non chegou por pouco a un centro pechado de Ainhoa Marín. Antes da media hora un remate bombeado afastado de Carlota foise por encima do traveseiro.
No minuto 32, Ana Vales sostivo as esperanzas coruñesas ao deter un penalti que ninguén no campo explicábase. A colexiada xustificouno por un agarrón mentres una dos seus asistentes afirmou que por mans.
As herculinas loitaron por unha remontada que non chegou
Na segunda metade, a intensidade do vento diminuíu, aínda que si favoreceu lixeiramente a un Dépor ABANCA que saíu a por todas, creando nos primeiros minutos as súas mellores oportunidades para sacar algo positivo do José Luis Saso. No minuto 49, Eva Dios estrelou no traveseiro unha falta lateral desde a esquerda. No 53, unha defensora despexou sobre a liña de gol un remate de Aroa coa zurda tras unha longa xogada posterior a un saque de esquina.
Un centro de Patri, cabeceado fóra por pouco por María Ruiz no minuto 56, deu paso ao carrusel de cambios e perdas de tempo do CD Parquesol que conxelou o dominio coruñés. Nin sequera os cambios ofensivos de Miguel Llorente, coa entrada primeiro dunha centrocampista, Alba Merino, por unha defensa, Goretti, e máis tarde dunha dianteira, Adule, por outra defensa, Patri López, serviu para xerar ocasións claras para, polo menos, rescatar un punto.
No minuto 83, María Ruiz enviou fóra unha falta directa desde a frontal da área. Ao comezo dos cinco minutos de tempo engadido, Adule enganchou un balón solto na área tras unha falta lateral, pero o seu remate foi a mans de Jimena. Finalmente, co Dépor ABANCA envorcado, o CD Parquesol dispuxo dunha clara contra que freou Carlota nunha falta que desviou a barreira a un saque de esquina co que concluíu o encontro.
