Volta á Ok Liga logo de case un mes de parón. As coruñesas do HC Borbolla reciben a un complicado Telecable HC. Será esta tarde (sábado 9 de xaneiro) en Monte Alto contra ás 20:00 horas.
As galegas son colistas e as asturianas un dos equipos aspirantes ao título. Agora mesmo ocupan a terceira posición no Grupo A. No seu último cruce, celebrado en 2020, o Telecable vencía por 8-0 ao CP Las Rozas, o que fala do seu potencial goleador. Xunto co Manlleu son as máis goleadoras do grupo con 62 tantos ao seu favor. So cederon puntos en tres ocasións: un empate na primeira xornada co Cerdanyola (1-1), cunha derrota pola mínima 3-4 co Manlleu e outra xa na segunda volta por 2-4 co Cerdanyola (a súa besta negra nesta tempada).
Na primeira volta as asturianas endosaron un 8-2 ás galegas. Para este encontro o técnico das de Gijón ten a baixa de Angy e a dúbida de Rebeca que arrastra molestias pero, en principio, viaxa á Coruña. Arbitrará o choque o colexiado Íñigo López Leiton.
Na recta final do pasado ano, o HC Borbolla amosou signos de clara melloría no seu xogo. Se ven o seu último partido, xogado co Cerdanyola, perdía, facíao poñéndose dúas veces por diante e cedendo o marcador so nos 3 últimos minutos de xogo. Daquela o adestrador das coruñesas aseguraba que posiblemente fose “o seu mellor partido da tempada”, e falaba desa melloría no xogo das galegas.
Para Santi Martínez este período de parón competitivo era unha ocasión para “seguir correxindo erros, así como apuntalar os nosos puntos fortes”. “O parón da competición chega cando mellor estabamos e cunha dinámica totalmente ascendente, así que esperamos que non nos perxudique e serva para voltar máis fortes”, sentenciaba naquel momento o entrenador das galegas.
“Sabemos do potencial do Telecable”
Hoxe, logo dese tempo, mantense seguro das posibilidades das súas pupilas pero cos pés na terra, consciente das dificultades do cruce desta fin de semana. Así, declaraba a As Nosas que o partido contra o Telecable HC “vai ser moi difícil. Son un dos equipos grandes e firmes candidatas ao título. Nós tomámolo como un partido máis. Sabemos do seu potencial, pero levamos a idea de tentar gañar e seguir medrando como equipo”.
Para esta cita, na que os patíns e a bóla voltan rodar na Coruña, o adestrador do HC Borbolla conta con todos os seus efectivos disponibles para medir forzas co Telecable de Gijón. Non ten baixas, pero tampouco novidades en forma de reforzos que se incorporasen ao club nestas semanas. No equipo rival, volve á súa cidade unha coruñesa: María Sanjurjo. A xogadora internacional galega, ex do HC Liceo, milita hai anos nas filas do Telecable HC.
