Intratable, histórico, épico, enorme… elixan vostedes o cualificativo que pensan que máis se lle axusta ao BAXI Ferrol deste curso 2020-21 que vén de acadar o ascenso á Liga Feminina Endesa.
A súa superioridade foi indiscutible de inicio a fin dunha competición que remata invicto logo de vencer hoxe, no partido decisivo, por 81-72 ao Osés Construcciones Ardoi.
Sería tremendamente inxusto que o único partido que perdese o BAXI Ferrol fose xusto o que máis contaba, o de hoxe. Pero ás veces, xa se sabe que, como dicía Andrés Montes, “a vida, pode ser marabillosa”. Cun traballado trunfo ante o Ardoi, logo de ir por detrás no marcador parte do partido, o conxunto ferrolá, que adestra Lino López culmina a unha histórica tempada na que volta á máxima categoría do baloncesto feminino estatal.
Mirando as súas estatísticas desta curso, pódese afirmar, sen dubidar que o seu ascenso é merecido. As xogadoras do equipo da Cidade Departamental sumaron 29 partidos consecutivos sen perder esta liga 2020-2021.
Coas bancadas do Pavillón Europa alcanzando a súa capacidade máxima, o BAXI Ferrol conquistou o ascenso a LF Endesa. O cadro que dirixe Lino López superou a adversidade e recompúxose tras ir perdendo por 15 puntos no segundo cuarto. Con esta vitoria, o equipo galego suma unha tempada histórica con 29 triunfos e ningunha derrota.
A primeira praza de ascenso á LF Endesa é para un BAXI Ferrol que derrotou a un loitador Osés Construcciones Ardoi que foi por diante no marcador durante boa parte do encontro. Chegando o final do terceiro cuarto apareceu Brooke Salas, que liderou a tarefa ofensiva e que estivo acompañada dunha Natalia Rodríguez que un día máis revolucionou o encontro coa súa enerxía e o seu acerto exterior.
A tempada regular do conxunto ferrolán xa fora histórica (26-0) pero alcanzar o ascenso a LF Endesa nesta fase final de Leganés, sen sumar ninguna derrota nos tres partidos disputados, púxolle o broche de ouro. O equipo galego logrou a súa meta pero non foi unha tarefa nada fácil pois o Osés Construcciones Ardoi foi un máis que digno rival que llo deixou todo na pista do pavillón Europa.
O BAXI Ferrol entrou a pista concentrado e coa de idea de implantar o seu ritmo por medio dunha enchufada Irene Garí (14-7), pero non tardou o Osés Construcciones Ardoi en botar abaixo o plan do rival desde a defensa, o control do rebote e un bo acerto de tres (19-22).
Un gran comezo do segundo cuarto de Tamara Montero con sete tantos consecutivos (22-29) inaugurou o gran momento do Osés Construcciones Ardoi, que cun xogo moi colectivo alzouse até os 15 puntos de vantaxe (28-37). Recortou o Ferrol con dúas accións do seu interior Sune Swart (38-45), aínda que se mantivo certeiro o Ardoi e cunha gran intensidade atrás mantivo a vantaxe ao descanso (41-48).
A reacción do BAXI Ferrol
Un triplo de Iranzu Echavarria (41-53) deu paso a un terceiro período no que o Osés Construcciones Ardoi foi capaz de manter a súa vantaxe até o ecuador (46-57), tempo no que o Ferrol subiu o nivel defensivo e atopou a unha das súas referencias ofensivas desta fase final, Brooke Salas, á que se sumou o acerto exterior e a agresividade defensiva de Natalia Rodríguez.
Con tres triplos, de Rodríguez, Cabrera e Benet, as de azul tomaron a dianteira (67-64).
As boas sensacións chegaban agora desde o lado do Ferrol, que foi aumentando aos poucos a súa renda (72-68), aínda que de maneira paulatina porque o combinado navarro seguiu anotando por medio de Filipe (74-70).
Os puntos de Salas e Benet puxeron unha nova máxima a falta de escasos segundos para un final (81-72) no que houbo explosión de alegría no banco ferrolán tanto polo ascenso como por superar o dificilísimo encontro proposto polo Osés Construcciones Ardoi.
E por se todo iso non abondase, ao final do partido Brooke Salas foi elixida MVP cun 25 valoración, Diana Cabrera, do Ardoi, quedou un punto por debaixo (24).
Dous equipos galegos militarán na máxima categoría do baloncesto feminino estatal o vindeiro curso. Logo deste ascenso, o BAXI Ferrol compartirá categoría co Durán Maquinaria Ensino de Lugo.
FICHA TÉCNICA
81) BAXI FERROL: Brooke Salas (18), Laura Fernández (3), Irene Garí Gilabert (6), G. Leaupepe (5) e M. Aijanen (8) – quinteto inicial -. Tamén xogaron: Patri Cabrera (3), Mungo (-), Patricia Benet (11), Natalia Rodríguez (14), Andrea Boquete (2) e Sune Swart (11).
72) OSÉS CONSTRUCCIONES ARDOI: Diana Cabrera (10), Tamara Montero (11), Iranzu Echavarria (13), Arregui (9) e Filipe (10) – quinteto inicial -. Tamén xogaron: Marcos (-), Cases (6), Vicente (6), Gastaminza (-), Aylea (7) Santesteban (-) e Navarro (-).
PARCIAIS: 19-22, 22-26, 26-16 e 14-8
ÁRBITROS: Josep Lluis Presseguer e Aldo Jesús Rodríguez Francisco, sen eliminadas.
INCIDENCIAS: Partido correspondente á fase final da Liga Feminina 2 (LF2) no que se determinaba un dos postos de ascenso á Liga Feminina Endesa. Disputado no Pavillón Europa de Leganés ante o aforo máximo de público permitido por mor da pandemia de COVID-19.
Lino López: “É unha sensación irrepetible. Por iso son adestrador e amo o baloncesto”
