O fútbol gaélico de ámbito autonómico da comezo esta fin de semana, así que, un ano despois da súa suspensión oficial por mor da chegada da COVID-19, esta disciplina está de volta. Faino, polo tanto, logo dun longo parón dun ano sen xogar.
Con todo, esta disciplina deportiva non se libra dos cambios con respecto a outras tempadas en adaptación á nova realidade que vivimos marcada pola pandemia coa que estamos a convivir. Neste caso, o maior cambio con respecto a anos anteriores no fútbol gaélico será o uso obrigatorio da máscara.
Segundo indica a Real Federación Galega de Fútbol, no gaélico “todos os equipos participantes nas ligas autonómicas xa adestraron coa máscara durante o periodo de posta a punto e tamén competirán con ela nun exercicio de gran responsabilidade tendo en conta a actual situación sanitaria”. De feito, a liga autonómica masculina xa se iniciaba a pasada fin de semana co uso deste elemento de protección.
Malia que Auriense e Estrela disputaron un encontro amistoso a pasada fin de semana que supuxo o primeiro paso para esta volta, a competición oficial empeza hoxe sábado 20 de marzo.
A competición autonómica feminina de fútbol gaélico terá formato triangular
En canto ao formato de competición, esta primeira fase do seu regreso será cun triangular entre tres conxuntos: un formado por xogadoras de Vigo e Gondomar, outro de Ourense e Lalín e o último da Coruña e Compostela. Búscase un formato curto que permita rematar a competición e que ningún equipo se quede sen xogadoras para poder afrontar os partidos deste campionato.
- Fillas de Breogán + Estrela Vermelha
- Herdeiras de Dhais + Auriense
- Independiente + Turonia
O primeiro partido se disputa no Manuel Anxo Cortizo de Lalín entre o combinado de xogadoras do Herdeiras de Dhais + Auriense e do que xunta aos equipos do Independiente + Turonia.
O seguinte cruce é Independiente + Turonia contra Fillas de Breogán + Estrela Vermelha
E o terceiro que pechará o triangular será o encontro entre o combinado Fillas de Breogán + Estrela Vermelha contra o Herdeiras de Dhais + Auriense.
Os resultados e clasificación da competición desta tempada pode seguirse nesta ligazón da Asociación Galega de Fútbol Gaélico
A competición no fútbol gaélico parábase oficialmente xustamente hai un ano.
Suspendida toda a competición de fútbol, futsal e gaélico en Galicia polo COVID19
