Seguramente se lle preguntamos a alguén así, de golpe, que pensa de 2020, dirá que foi un ano nefasto. Pero se cadra, rascando un pouquiño resulta que este 2020, que certamente pasará á historia por ter agromado nel unha pandemia mundial, será lembrado por máis cousas que a COVID-19.
O coronavirus marcounos en todos nos aspectos da vida, tamén no deportivo. Pero, se cadra, co tempo, lembraremos máis como seguimos cara adiante, ca todos os funestos hitos dun tempo pasado que está a ter aínda continuidade no 2021.
Para as persoas que formamos parte da redacción de As Nosas, por exemplo, 2020 sempre será o ano no que naceu este xornal que quere ser a voz do deporte feminino en Galicia.
Co gallo do no noso aniversario quixemos preguntar a distintos clubs que representan unha parte do deporte galego, como foi ese 2020 no que empezamos a contar os seus trunfos, as súas derrotas, os seus soños… E si, a COVID-19 marca o discurso, por que mudou as nosas vidas e tamén o deporte, pero detrás da pandemia tamén houbo no 2020 títulos, ascensos e apredizaxe, moita apredizaxe para facérmonos máis fortes e seguir gozando do que nos gusta, o deporte feminino.
Aínda que muden as formas, os protocolos nos teñan abrumadas, e o noso sorriso se agache tras dunha máscara que nos protexe até que veñan tempos mellores (que virán), o deporte segue a ser o voso e o noso espazo para gozar da vida.
