Mañá sábado día 27 de maio, ás 18.30 horas no Pavillón Municipal A Seca de Poio, xogarase o último partido da liga regular de Primeira Federación de Futsal Feminino. A xornada 30 ten reservado un derbi galego entre Poio Pescamar e Pescados Rubén Burela FS no que o segundo posto está en xogo. Ambos os dous equipos xogarán o play-off polo título de liga.
Partido moi especial porque, ademais de ser o último e ser o gran derbi galego deste curso. O partido entre vermellas e laranxas xa é un clásico, nel decidirase o segundo posto da clasificación para a fase de play-off onde se decidirá quen gaña a Liga 2022-2023.
O factor cancha será unha cuestión a ter en conta. Trátase dun dos puntos fortes do Burela FS, que xogará a fase de play-off de novo contra o Poio Pescamar. As Raíñas Laranxas viaxan a Pontevedra a dar o seu 100% coa intención de conseguir xogar na casa o primeiro partido e, de darse un terceiro, tamén, dous de tres. Pero enfronte terán a un Poio Pescamar que non regala nada. Ambos os dous equipos chegan empatados a puntos a esta última xornada. Por diante están as da Mariña.
Antía Perez, futbolista do Burela: “O Poio atopou a regularidade que outros anos non tiña”
Falamos con Antía Pérez, actualmente guerreira laranxa pero ex – xogadora do Poio Pescamar. Sobre o final da tempada a futbolista galega declaraba: “Ao final sempre queremos sumar +3 e eu creo que acabar a tempada con +3 en Poio sería moi importante para xogar dous partidos aquí diante da nosa xente, da nosa afección, sería dobre especial e moito máis levadío”.
Con respecto ao rival, o Poio Pescamar, Antía Pérez apuntou: “Eu creo que a día de hoxe Poio atopou a regularidade que se cadra outros anos non estaba tendo. A día de hoxe ten un sistema de xogo moi marcado e son un equipo moi forte, sobre todo na súa casa. Con moitas gañas de ir alí e sacar os 3 puntos”.
Ver esta publicación en Instagram
Sobre o seu propio equipo, o Pescados Rubén Burela FS, a futbolista dixo na previa: “Primeiro hai que xogar o partido deste sábado, quédanos un partido de liga regular que hai que gañar para poder encamiñar os play-off. Eu véxonos preparadas, levamos moitos títulos esta tempada, estamos traballando ben e estanse vendo os resultados de todo o traballo de todo o ano. Con moitas ganas de que veña xa o play-off“.
