Representantes da Unión de Federacións Deportivas Galegas e o secretario Xeral para o Deporte da Xunta de Galicia, José Ramón Lete Lasa, mantiveron unha reunión para avaliar o escenario actual e as propostas de axuda ao deporte federado galego. Tamén as liñas de traballo conxuntas presentando a UFEDEGA medidas concretas para o curto prazo.
A UFEDEGA trasladoulle ao secretario Xeral para o Deporte da Xunta de Galicia, José Ramón Lete Lasa, as preocupacións e necesidades das federacións deportivas galegas derivadas do complexo escenario provocado pola pandemia e das restricións adoptadas no último mes e medio para conter a expansión do virus e dobregar a curva de contaxios da COVID-19.
Segundo explica UFEDEGA, neste tempo de parálise deportiva, coa colaboración das federacións deportivas galegas, fixo un detallado estudo e elaborou un documento denominado: “Aportacións para axudar a mellorar as circunstancias das federacións e entidades deportivas galegas”.
UFEDEGA achega medidas urxentes e a curto prazo
Neste documento, recóllense “20 propostas de axuda en catro grandes bloques: financiamento, simplificación da xestión das entidades deportivas, aproveitamento de sinerxias entre entidades e melloras no desenvolvemento da actividade deportiva”, explica UFEDEGA.
O paquete de propostas fai diferenza entre medidas de urxente aplicación e propostas de desenvolvemento e profesionalización que deberían pórse en marcha no curto prazo.
A análise do escenario actual “deu como resultado a relación de propostas e peticións presentadas neste documento de consenso, positivamente acollido pola administración e que necesita do seu impulso”, aseguran desde UFEDEGA.