A Unión de Federacións Deportivas Galegas (UFEDEGA), vén de remitir aos medios un comunicado ante a actual situación do Deporte Federado en Galicia. Amósase preocupada pola viabilidade de entidades que acumulan xa un parón de seis meses. Os protocolos, os accesos a instalacións, e a concesión de subvencións son cuestións que plantexan desde este colectivo.
Segundo explica a entidade “o deporte galego está a pasar por un dos momentos máis difíciles da súa historia. A incidencia da COVID-19 na nosa sociedade provocou un escenario económico incerto e repleto de novos retos para todas as entidades e organismos que pelexan no día a día para promocionar algo tan esencial e saudable nas nosas vidas como é a práctica deportiva”.
Seis meses de iniactividade
Para UFEDEGA “despois dunha das épocas máis complicadas para o noso país, dun confinamento cheo de temores, cando parecía que xa pasaramos o peor e que por fin os nosos deportistas poderían competir nas diferentes disciplinas deportivas, atopámonos cunha paralización da práctica deportiva de contacto e combate afeccionado que xa vai máis aló dos seis meses e que é difícil de soportar para as federacións e os nosos clubs, que se atopan nunha grave situación de viabilidade. Unha realidade difícil de entender para o deporte xa que non hai ningunha outra prohibición de tal calibre en ningún sector da sociedade”.
Considera Unión de Federacións Deportivas Galegas que as federacións e clubs galegos, “amosaron a súa empatía e implicación coa sociedade e coas administracións nun momento no que, en tempo récord, houbo que reinventarse e chegar aos domicilios dunha poboación que precisaba do entretemento e dos beneficios da actividade física deportiva, non dubidamos en sumarnos ás labores de voluntariado, en doar e prestar material ou en dar apoio en calquera das formas que estivese nas nosas mans. O deporte galego tratou de estar á altura dunhas circunstancias que requirían unión, iniciativa e solidariedade”.
Dende a Unión de Federacións Deportivas Galegas (UFEDEGA), manifestan:
- A necesidade de salvar e pelexar polo presente e futuro do deporte federado de Galicia. Pedimos axuda, empatía e solucións para un sector que supón a 2,63% do PIB Galego, do que dependen 272.000 deportistas, máis de 15.000 familias e que proporciona ingresos recorrentes a máis de 2.300 empresas.
- As federacións deportivas galegas, e as súas entidades e deportistas levan meses traballando en exhaustivos e amplos protocolos para recuperar a súa actividade e garantir as medidas necesarias para minimizar os riscos ante un virus que non entende de economía, nin de política, incluso nin de ámbitos xeográficos, tan só de responsabilidade e disciplina, algo no que o mundo do deporte pode dar grandes leccións.
- En UFEDEGA defenden que son 17 as federacións deportivas galegas de contacto e de combate que nestes momentos seguen inmersas nun confinamento deportivo sen precedentes, dezasete federacións que representan o 70% das licenzas deportivas galegas , que piden regresar coa máxima seguridade sen perder a esencia das súas disciplinas, con cautela e respecto, pero sen medo.
- As federacións deportivas galegas, ao igual que as nosas entides e deportistas estamos máis unidas ca nunca e confíamos no traballo realizado así como nas medidas propostas para a reactivación. Non eludimos responsabilidades e por iso solicitamos que as diferentes instancias do deporte tampouco o fagan, precisamos decisións, implicación, consenso e solucións urxentes.
- Entramos nun período de tempo fundamental e decisivo para a práctica deportiva de contacto e de combate. Se nestas dúas próximas semanas non se pon fin a esta paralización nos abocará á inactividade ata máis aló do inicio do 2021, situación que daría lugar á desaparición de moitas entidades deportivas galegas.
- Ufedega solicita “a todas as institucións tanto privadas como públicas, nacionais, autonómicas, provinciais e locais o apoio de defensa do deporte. Pedimos coordinación entre institucións, rogamos non nos supriman axudas ou subvencións e instamos á colaboración cos propietarios/as das instalacións. Por favor, é urxente a confirmación dun protocolo marco entre as máximas instancias deportivas para poder regresar ás que durante moito tempo foron as nosas casas. As federacións e os clubs podemos facilitar o camiño, pero todos vós tendes a chave, precisamos organización, empatía e implicación con todas esas entidades que tantas alegrías nos daban non hai moito tempo”.
- Na Unión de Federacións Deportivas Galegas realizan “un chamamento aos responsables políticos e á sociedade para que se suban ao barco da esperanza; o deporte é saúde, é vida, non é un problema, o deporte galego federado pode ser parte da solución na concienciación social e no adoutrinamento das medidas preventivas ante a COVID-19, na conciliación familiar, etc…”
