O deporte, como todos os ámbitos da vida, está en continua adaptación ás circunstancias da pandemia de COVID-19 e ás actualizacións das medidas para contela. Por este motivo, este martes, 26 de xaneiro, a Unión de Federacións Deportivas Galegas (UFEDEGA) organizou unha reunión coas distintas Federacións.
A xuntanza centrouse na paralización do deporte federado a nivel autonómico, unha das últimas medidas tomadas pola Xunta de Galicia. Preto dunha trintena de presidentes das Federacións xuntáronse nesta reunión telemática para abordar os retos do futuro do deporte galego.
Tras a análise da situación actual, a conclusión común foi a necesidade de colaborar coa Administración, como se leva facendo nos últimos meses. De feito, a elaboración de protocolos para a reanudación de competicións e adestramentos realizouse cooperando coas autoridades competentes.
Tal e como informa a UFEDEGA nun comunicado, o presidente da Asociación, Rafael Louzán, declarou que “é necesario abordar as liñas de coordinación coa Administración, dado que este é un problema común que entre todos debemos solucionar”.
O deporte federado galego como “sector estratéxico” segundo a UFEDEGA
Pero a presente situación non foi o único tema tratado na reunión. A UFEDEGA recorda tamén nesta nota informativa que o deporte federado galego evolucionou de tal maneira nos últimos anos que xa se pode falar del como “un sector estratéxico que serve de tractor para outras ramas produtivas, un elemento dinamizador dentro do engrenaxe socioeconómico”.
Desde a Asociación explican que o deporte galego realiza funcións delegadas polo sector público, polo que os presidentes das Federacións consideran “necesario un estudo dos marcos legais sobre a financiación da orixe pública e privada”.
Primeiros pasos dun futuro convenio colectivo
Neste sentido, as entidades reunidas reflexionaron sobre as prorrogacións dos ERTE. Dentro deste aspecto, a UFEDEGA comezou xa a dar os primeiros pasos na elaboración dun convenio colectivo para as persoas traballadoras das federacións deportivas, incluindo os propios clubs, “constituíndo un soporte no eido laboral que só ten un fito similar no territorio español”. Sobre isto tamén recordaron que se seguen cumprindo as liñas de traballo acordadas para este exercicio.
Segundo expoñen no comunicado, a redacción deste convenio colectivo permitirá superar a “situación actual da adaptación aos convenios xa existentes, que nada teñen que ver co réxime operativo dos entes federativos”.
Este acordo permite a creación e recoñecemento das distintas categorías e carreiras profesionais para as e os traballadores das Federacións e clubs deportivos galegos. “Seguimos a traballar polo deporte na nosa comunidade, convencidos de que volveremos a desfrutar xuntos”, conclúen.
