Ante o aumento constante de casos de COVID-19 en Galicia, a Xunta anunciou esta mesma semana novas medidas para atallar o virus. Entre elas, atópase a suspensión do deporte federado de nivel autonómico, mantendo as competicións estatais. Tras este anuncio, as Federacións Galegas reuníronse co secretario xeral para o Deporte, Xosé Ramón Lete Lasa.
Ante esta situación, a Unión de Federacións Deportivas Galegas (UFEDEGA) ven de emitir un comunicado expresando a súa opinión en relación ás novas medidas no que defenden que o deporte é parte da solución ao tempo que ofrecen a súa colaboración para todo o que fose necesario.
Os argumentos da UFEDEGA
“Cremos firmemente que o deporte é parte da solución”, expoñen desde a UFEDEGA. No escrito, establecen varios argumentos a favor da práctica deportiva, incluso en tempos de pandemia. Segundo recordan, a actividade federada “é unha actividade regulada”, que segue “estritos protocolos, avalados por recoñecidos expertos e aprobados pola esixente administración pública”.
UFEDEGA: “O deporte federado segue estritos protocolos, avalados por recoñecidos expertos e aprobados pola esixente administración pública”
Da mesma forma, sosteñen que durante os pasados meses de competición, apenas houbo casos no ámbito deportivo e destacan a labor do deporte federado “no cribado e control da pandemia” ao ter realizado “máis de 35.000 test de detección”.
Precisamente, a Real Federación Galega de Fútbol anunciou recentemente os datos tanto dos test realizados como da incidencia de positivos, que en termos porcentuais é dun 0,1%.
A Federación Galega pon en valor o papel do fútbol no cribado da COVID en Galicia
Máis aló dos datos relativos á incidencia da COVID-19, a UFEDEGA tamén cita a importancia da actividade física como “esencial para evitar o sedentarismo e as enfermidades derivadas do mesmo”, ademais de “fortalecer o noso sistema inmunolóxico e psicolóxico”. Rematan argumentando que o deporte complementa “a formación académica e familiar que reciben os nosos pequenos/as”.
UFEDEGA: “Queremos trasladar todo o noso apoio ás persoas que están loitando para superar esta situación”
Con todo, insisten en que ofrecen a súa colaboración para todo o necesario e trasladan o seu apoio “ás persoas que están loitando para superar esta situación” e desde a organización móstranse “moi preocupados” polas novas medidas.
O deporte galego, unido
“Nos últimos meses, o deporte federado galego acreditouse como un exemplo a seguir pola súa capacidade de adaptación e traballo, grazas a unha forte e crecente unión entre as Federacións que permitiu avanzar, sempre en colaboración coa Administración, pola recuperación dos adestramentos e competicións na nosa comunidade”, puntualizan desde a UFEDEGA.
UFEDEGA: “O deporte federado galego acreditouse como un exemplo a seguir pola súa capacidade de adaptación e traballo”
Segundo expoñen no comunicado, estas novas medidas truncan o traballo realizado ata este momento, en materia de protección da saúde dos e das deportistas galegas e o seu entorno. Este novo parón, causará un “período de moita incerteza”.
Federacións galegas como a de fútbol ou a de baloncesto tamén emitiron os seus propios comunicados. Pola súa parte, o presidente da Federación Galega de Atletismo, trasladoulle ao secretario xeral para o Deporte, José Ramón Lete Lasa algunhas dúbidas sobre a mobilidade entre concellos para deportistas federadas que compiten en ámbito estatal, para os que a competición non se detén.
A suspensión da competición do deporte federado en Galicia non afecta as competicións estatais
