A Unión de Federacións Deportivas Galegas (UFEDEGA) e a asociación Aminogal veñen de asinar un convenio de colaboración para loitar contra o abuso e o maltrato infantil no ámbito deportivo. Co escrito potenciarase a prevención, detección e resolución destes episodios a través de charlas e programas de asesoramento para adestradoras e persoal das Federacións.
O deporte é recoñecido como un elemento clave para a saúde, formación e socializacións das rapazas e rapaces, polo que debe ser un entorno positivo no que prime a seguridade e a protección das propias deportistas. Máis aínda en idades temperás.
Malia todas as bondades da actividade deportiva na base, tamén existe un campo de mellora. Segundo informa o Consello de Europa na campaña Un de cada Cinco, un 20% de nenas e nenos sofren algún tipo de violencia ou abuso sexual.
O pacto entre a UFEDEGA e Aminogal
Conscientes desta realidade, a UFEDEGA pretende avanzar cara a igualdade e a defensa dos dereitos de todas as deportistas. Por este motivo, a organización asina o pacto de colaboración con Aminogal.
Esta asociación encargarase de asesorar ás Federacións deportivas en materia de prevención e loita do abuso sexual infantil. Ademais ofrecerá, mediante charlas e xornadas formativas, as ferramentas aos adestradores e persoal dos entes federativos para a prevención e loita contra o maltrato infantil no ámbito do deporte.
Na firma do acordo estiveron presentes o presidente, Rafael Louzán, representando á UFEDEGA, e Aida Blanco, presidenta de Aminogal. O convenio afianza así a liña de traballo da Lei Orgánica de protección integral á infancia e adolescencia fronte a violencia (LOPIVI), que vén de ser aprobada o 20 de maio no Congreso dos Deputados.
Sobre esta, o CSD fixo as pertinentes moficiacións e ampliacións do capítulo IX sobre ocio e deporte, con guías e protocolos adaptados ao ámbito deportivo para a prevención e loita contra a violencia e abuso sexual infantil.
O pacto presentado completa unha estratexia apoiada pola Xunta de Galicia que xa permitiu levar a cabo iniciativas como o programa formativo “Poñendo os lentes no deporte”, promovido no mes de abril polo Comité Galego de Adestradores da Real Federación Galega de Fútbol.
