A Liga Galega de Fútbol Gaélico 2022-23 xa ten campioas. As futbolistas do Turonia Gondomar Fútbol Gaélico veñen de proclamarse ganadoras do campionato autonómico.
O encontro da xornada foi contra o Estrela Vermelha de Santiago de Compostela, vencendo nun partido que comezou nun primeiro momento moi igualado pero que pronto se decantou para as gondomarenses, cun final de 14 – 19.
Nesta última xornada de Liga as futbolistas do Turonia GFG conseguiron traer o campionato para Gondomar só cunha derrota en toda a competición ligueira.
“Logo dun ano cunha pre tempada complicada, que mesmo puxo en dúbida a continuidade da equipa feminina, o traballo de base da directiva e dun corpo técnico comprometido (formado por Alex Álvarez e Juancho Larras) xunto con, finalmente, un grupo de xogadoras veteranas e de nova fornada. Esta combinación deu lugar á fórmula perfecta para acadar un equipo competitivo e fiable, quen de acadar os mellores resultados deportivos”, tal e como salientan desde o club.
Proba disto é a selección de varias das nosas xogadoras para nutrir ás filas da Selección Nacional Galega, que irá competir no FRS GAA World Games 2023, Mundial de xogos Gaélicos da GAA (Gaelic Athletic Association) que se celebrarán en Derry (Irlanda) entre o 24 e 28 de xullo deste verán.
Tamén, a clasificación acadada na Liga Galega levou as futbolistas do Turonia GFG a clasificarse para as Finais do Campionato Ibérico Senior que, precisamente, se celebrará en Vigo este vindeiro 6 de maio. O feminino do Turonia GFG enfrontarase alí á elite do fútbol gaélico ibérico como: Madrid Harps, Barcelona Gaels, Eire Og Sevilla, San Vincent Valencia, Estrela Vermelha de Santiago de Compostela e Fillas de Breogán da Coruña.
No ámbito galego aínda resta a competición do All-Galiza feminino, ao que as nosas voltan postularse como firmes candidatas a pelexar polo título.
Quinto aniversario do Turonia GFG
“Este ano, no mes de abril, o club Turonia GFG cumpriu o seu 5º aniversario, somos o segundo clube máis novo da competición galega, pero aínda así as deportistas da entidade demostran que con traballo, constancia e implicación todo é posible no mundo do deporte”, apuntan desde o club de Gondomar.
A directiva do Turonia GFG felicita “as nosas mulleres e agradece este título maior que encumbra o fútbol gaélico miñorán á elite europea. Non pode haber mellor regalo de aniversario para estes 5 anos de traballo deportivo”.
