- “Esta colaboración, a través de Turismo de Galicia, contribúe á estabilidade económica do club e enmárcase na aposta do Executivo autonómico por vincular o deporte de alto nivel coa proxección da imaxe turística da comunidade”, explican desde o Burela FS.
O delegado territorial da Xunta de Galicia en Lugo, Javier Arias, mantivo esta mañá unha reunión co presidente do Burela FS, José Luis Sáez, nas oficinas do club, na que lle reiterou o apoio do Goberno galego ante a complicada situación económica que está a atravesar a entidade.
Javier Arias puxo en valor o compromiso da Xunta de Galicia co club burelés, ao que apoia cun contrato de patrocinio a través da Axencia de Turismo de Galicia por valor de 30.000 euros.
O presidente da entidade agradeceu esta colaboración da Xunta a través de Turismo de Galicia, que contribúe a dar estabilidade económica á entidade. A acción enmárcase ademais “na aposta do Executivo autonómico por vincular o deporte de alto nivel coa proxección da imaxe turística da comunidade”, explican nun comunicado desde o Burela FS.
No encontro desta mañá abordáronse tamén outras posibles vías de colaboración futuras para garantir a continuidade do proxecto deportivo do Burela FS.
Javier Arias destacou que o club burelés “representa non só un exemplo de excelencia deportiva, senón tamén un motor de dinamización social e económica para A Mariña, e desde a Xunta de Galicia apostamos por prestarlle o noso apoio para que poida seguir sendo un referente dentro e fóra de Galicia”.
