O vindeiro domingo 21 de marzo ás 11:30 o Aceites Abril Club Voleibol Ourense vaise enfrontar ao Club Voleibol Oviedo, co obxectivo de conseguir unha praza para o playoff de ascenso á Superliga Feminina 2. Se gaña, é súa.
O Aceites Abril CVO despídese da liga regular na súa pista, O Pompeo, onde loitarán por derrotar ao CV Oviedo que xa é campión a falta de dúas xornadas por disputar desta fase.
Así, nesta xornada número 21 do campionato nacional na Primeira División, o partido estrela será o que enfronte ao equipo ourensán coas actuais e líderes invictas da categoría, as xogadoras do CV Oviedo.
As deportistas do Aceites Abril CVO terán que pór todo o seu potencial na cancha do Pompeo se queren dar a sorpresa e terminar segundas nesta liga regular.
No será doado xa que o CV Oviedo aínda non coñece a derrota en todo o que vai de liga e a súa posición de líder da liga xa ninguén poderá facela perigar.
O plantel dirixido por Pablo Pérez vén de levarse de forma clara o derbi galego que lles enfrontaba ao conxunto do CV Bruxas. Con este partido pechaba a súa cuarta vitoria consecutiva, polo que as ourensás están nun bo momento competitivo.
Pola súa banda as visitantes do CV Oviedo descansaron na xornada anterior. Por outro lado, logo do encontro desta xornada que lles enfrenda ás galegas, restaralles un encontro máis para finalizar a primeira volta. Ese último cruce antes da loita polo ascenso será fronte á AD A Curtidora.
Xoge o ascenso ou non, o Aceites Abril CVO fixo unha boa tempada
Con este encontro pecharase unha sobresaliente tempada para o Aceites Abril que no caso de non conseguir a vitoria terá que esperar á última xornada para coñecer a súa clasificación final dependendo dos resultados dos equipos Universidade de Valladolid e a AD A Curtidora Universidade de Oviedo.
O partido ten aforo limitado debido ás restricións que teñen os recintos deportivos en Galicia por mor da pandemia de COVID-19, pero poderase ver polas redes sociais do @voleyourense. Polo menos sobre o papel, todo indica que se poderá presenciar un bo espectáculo de voleibol para todas as persoas que desexen gozar desta disciplina deportiva.
