Perder na cancha do Igualada Femeni HCP non entraba nos cálculos, nin nos plans do HC Borbolla de cara á salvación, pero o tropezo chegou e agora so queda mirar para adiante. As coruñesas caían derrotadas en terras catalás por un marcador de 5-2.
Esta derrota permitiu ao Igualada Femini HCP sobrepasar na clasificación ás coruñesas, non canto de aupalas como se esperaba para esta xornada quinta. A liña entre a tranquilidade e a preocupación é moi fina neste grupo na pelexa polo posto de bronce. Case todos os equipos camiñan sobre o fío.
O primeiro lugar de clasificación, salvo debacle, debería ser para o CP Esneca Vila-Sana (31 puntos) que xa empezaba a fase por encima dos demais equipos grazas ao arrastre de puntos. E no segundo lugar parece afianzarse cada xornada o Garatge Plana Girona CH (23 puntos).
Catro equipos a por un posto de salvación
Pero logo chega unha manchea de equipos que están todos nun pano, polo que pode pasar de todo na loita pola salvación. CP Alcorcón, Igualada, Ene Oposiciones Cuencas Mineras, Igualada Femení HCP, HC Borbolla e CP Alcorcón teñen aínda opcións matemáticas de chegar a manterse. Quen xa semella ter pouco que facer é o Areces Ecopilas Asturhockey que so suma 6 puntos.
Tres goles en tres minutos
O cruce entre o Igualada Femení HCP e o HC Borbolla empezou forte xa no seu nacemento. Apenas se levaban dous minutos xogados e chegou o primeiro tanto, obra de Raquel Bernadas (1-0), a goleadora do día. Respondeu ao momento a lusa Bea Varzeas igualando o choque (1-1). Nin vinte segundos lle levou a Raquel Bernadas volver adiantar as locais 2-1. Así, con tres minutos de xogo, no marcador electrónico xa lucía tres goles.
O 3-1 tardou un pouco máis en chegar. Asinouno Mar Franci a falta de 10 minutos para o final do primeiro tempo. E precisamente con ese marcador se chegaría a o descanso.
Na segunda metade o toma e daca de goles acougou. E até que faltaban 10 minutos para a conclusión do choque non volveron chegar as ocasións claras e os tantos. Primeiro Patricia Miret erraba no penalti e logo Raquel Bernadas facía o propio cunha falta directa. Pero, como deciamos, Bernadas estaba nun momento doce así que ela mesma se fixo co rexeitamento da bóla e conseguiu bater a Fernanda Tapias por terceira vez na súa conta persoal (4-1).
O segundo tanto do HC Borbolla foi unha falta directa que transformou a chilena Fernanda Muñoz (4-2). Non serviu para que as coruñesas iniciasen unha remontada. Ao contrario, aínda que daría un tanto máis para Patricia Miret que finiquitaría o marcador.
Deste xeito, as galegas caían derrotadas por un tanteo de 5-2 na cancha do Igualdad Femení HCP que se coloca por diante das tomatitas na clasificación. O HC Borbolla da un paso atrás, pero non se descolga da loita pola permanencia. Eso si, non o ten doado. No seu calendario cara a salvación restan rivais do peso do Vila-Sana, ou o Vilanova, aínda que tamén o Areces. Como no caso das asturianas, todo indica que carece de opcións.
Na lectura positiva, toca pensar polo tanto que, pese a perder e baixar á sexta plaza, o HC Borbolla segue a ter a permanecia a tiro de pedra. So dous puntos as separan da terceira praza. Por encima do HC Borbolla venceu o Girona, o Vila-Sana e empataron Vilanova e Cuencas Mineras. A derrota doe máis xa que, de non ter perdido, as tomatitas estarían unha vez máis na pomada.
Como deciamos, logo da disputa desta xornada o HC Borbolla colócase sexto a tres puntos do terceiro lugar que ocupa o CP Vilanova (15 puntos). Ese terceiro posto na táboa do Grupo D (o que loita pola permanencia), marca a fronteira entre a Ok Liga e o descenso á OK Liga Prata.
A competición vaise deter durante a Semana Santa, dese xeito, o seguinte partido do HC Borbolla será en en Monte Alto o vindeiro 10 de abril recibindo a un intratable CP Esneca Vila-Sana que non perdeu ningún partido desta fase, pero empatou co Girona.
FICHA TÉCNICA
5) IGUALADA FEMENI HCP: Mónica Ferrer, Patricia Miret, Raquel Bernadas, Mar Fraci e Clara Claramunt – quinteto inicial -. Tamén xogaron: Elba Garreta (C), Laia Cid, Qeralt del Àguila Munté e Arés Noguera. Cristina Riba (P.S.).
2) HC BORBOLLA: Fernanda Tapia, Lara Yáñez, Fernanda Muñoz, Bea Varzeas e Lucía Yáñez – quinteto inicial -. Tamén xogaron: Julia Cabanas, Antía Rivadas, Alba Díaz (C) e Marta Vilas. Edé Avecilla (P.S.).
GOLES: 1-0 Raquel Bernadas. 1-1 Bea Varzeas. 2-1 Raquel Bernadas. 3-1 Mar Franci. 4-1 Raquel Bernadas. 4-2 Fernanda Muñoz 5-2 Patricia Miret.
ÁRBITROS: Quim Navales Morera. Ignacio Montón López. Amosaron cartón azul a Patricia Miret polo Igualada e a Fernanda Muñoz polo HC Borbolla
INCIDENCIAS: Partido correspondente á quinta xornado do Grupo D da Ok Liga feminina no que se loita pola permanencia na categoría, disputado no Complejo Deportivo Les Comes de Igualada.
