A XI edición do Trofeo Sénior Torre de Hércules de golf celebrarase nesta fin de semana na Coruña, coa participación das 150 mellores golfistas dos principais clubs de España.
A concelleira de Deportes, Mónica Martínez, xunto ao presidente e ao director do Real Club de Golf da Coruña, Luis Quiroga e Florencio Martín, presentou a competición aos pés da propia Torre de Hércules.
A XI edición do Trofeo Torre de Hércules
A principal novidade desta edición, é que o torneo coruñés será unha das únicas 4 probas que puntúan para a clasificación nacional sénior masculina da que sairá o equipo que representará a España nos campionatos internacionais.
A edila lembrou que a primeira edición do campionato realizouse tras o recoñecemento da Torre de Hércules como único faro do mundo declarado Patrimonio da Humanidade e despois das dez edicións anteriores, este torneo consolidouse como un dos máis importantes da categoría que se realizan a día de hoxe en Europa.
O Real Club de Golf será o escenario no que se disputará o torneo no que se repartirán tres torres de ouro e doce de prata para quen gañe nas distintas categorías, un ano no que, como lembrou Mónica Martínez, o club de golf decano deste deporte en Galicia celebra o seu 60 aniversario.
Entre os premios a entregar atópanse tres Torres de Ouro, varias de Prata, e un premio especial Torre de Hércules de Ouro 2021. A cerimonia de entrega será o sábado, 3 de xullo, ás 19:00 horas.
Aposta polo deporte na cidade coruñesa
Para a concelleira a obriga do Goberno local é a de lle achegar ao público todos os deportes, darlles visibilidade. “É necesario apoialos e nesas estamos”, dixo.
“O concello sabe que o deporte fai cidade”, dixo, e por iso traballamos para consolidar o deporte como unha marca da Coruña apostando non só por deportes maioritarios, senón tamén polas modalidades menos coñecidas e minorizadas, ou por deportes como o golf, que ás veces levan colgada a etiqueta de pouco accesibles para o público.
Martínez lembrou que no campo da Torre hai clases municipais todo o ano e que o campo abre ininterrompidamente de luns a domingo.
