O XXIV Trofeo Internacional de Halterofilia Cidade da Coruña celebrarase esta fin de semana no pavillón dos Rosais coruñés. Nela estarán Irene Martínez e Ruth Fuentefría como parte da Selección Española, Eva Carrera e Amy Abelleira na Selección Galega e Irene Blanco e Noelia García do Club Halterofilia Coruña.
Despois dun ano de parón, o campionato internacional volve ao calendario. A cita terá lugar o sábado, 3 de xullo, a partires das 16:00 horsa e poderá ser seguida a través da canle de Youtube da Federación Galega.
A Coruña, sede da halterofilia internacional
Á competición acudirán equipos de Alemaña, Dinamarca, Eslovenia, Hungría e Portugal. Ademais, estará a Selección Española, unha Selección da Federación Galega e un equipo do Club Halterofilia Coruña. En total, seis halteras galegas competirán no trofeo.
A concelleira de Deportes, Mónica Martínez, presentou este venres no salón de plenos de María Pita o trofeo, acompañada polo secretario da Federación Española de Halterofilia, Juan Lama, o presidente da Federación Galega de Halterofilia, David Losada, e o presidente do Club de Halterofilia da Coruña, Francisco García, a edil anunciou “un clásico do calendario deportivo coruñés, polo que pasaron decenas de medallistas europeos e mundiais”.
A concelleira de Deportes deu a benvida ás expedicións de Dinamarca, Alemaña, Lituania, Hungría, Eslovenia e Portugal, e agradeceu a presenza tamén dos deportistas distribuídos nas seleccións de Galicia e España.
A edil fixo unha mención especial ao CH Coruña “unha das entidades máis destacadas da nosa cidade, guiada maxistralmente desde hai moitos anos por Ferenc Szabo, director técnico da Federación Galega”.
“Este club non deixou de aumentar o seu excelente palmarés nun ano de grandes dificultades. Desde outubro, só en campionatos de España, o club coruñés conseguiu 99 medallas”, sinalou.
