O polideportivo da Sagrada Familia acollerá este sábado 23 de maio o XIX Trofeo Internacional Cidade da Coruña de ximnasia rítmica, unha cita organizada polo Club Ximnasia Rítmica María Barbeito que converterá a cidade nun referente desta disciplina deportiva ao longo de toda a xornada.
O evento reunirá arredor de 300 ximnastas na sesión de mañá e outras 200 pola tarde, procedentes de clubs de Galicia, Asturias e Portugal, que competirán en diferentes categorías de ámbito autonómico e nacional, así como en probas de deporte adaptado. As competicións da sesión de mañá comezarán ás 9.30 horas e está previsto que rematen ás 14.30 horas.
Deportistas destacadas nesta competición de ximnasia rítmica
Entre as participantes destacadas estarán ximnastas de primeira categoría nacional como a coruñesa Candela Martínez e a asturiana Itziar Ordóñez, que competirán fronte a deportistas da elite portuguesa. Ademais, tamén participarán os recentes medallistas nacionais de ximnasia adaptada do club Santiago Apóstol e do María Barbeito.
O trofeo contará igualmente cunha destacada presenza masculina en diferentes categorías, nun contexto no que a ximnasia galega continúa consolidándose como referente nesta modalidade.
Xa pola tarde, a partir das 16.30 horas, celebrarase tamén no polideportivo da Sagrada Familia a II fase da Liga Promesas Jael, unha competición orientada ás categorías de iniciación e base, na que participarán arredor de 200 ximnastas de diferentes escolas e clubs de Galicia.
A xornada permitirá desfrutar de exhibicións e competicións tanto individuais como de conxuntos, reunindo desde deportistas de iniciación ata figuras do máis alto nivel nacional, cun obxectivo compartido: fomentar a práctica da ximnasia rítmica desde os valores da inclusión, a igualdade de xénero e a promoción do deporte base.
O concelleiro de Deportes, Manuel Vázquez, destacou “a importancia de que A Coruña continúe acollendo competicións deportivas de referencia que, ademais de promover hábitos de vida saudables entre a mocidade, visibilizan valores fundamentais como a inclusión, a igualdade e o deporte base”. Manuel Vázquez puxo tamén en valor “o traballo constante que realizan os clubs da cidade para consolidar a Coruña como un referente da ximnasia rítmica en Galicia e no conxunto do noroeste peninsular”.
O Concello da Coruña colabora nesta cita deportiva, que volve situar a cidade como escenario de eventos de referencia e que contribúe tamén á promoción do deporte inclusivo e da práctica deportiva entre a mocidade.
