Ouros para os galegos Mila López, Damián Ramos e Iván Montero no Campionato de España de Ciclismo paralímpico de estrada que se estivo celebrando na localidade lucense de Friol durante tres días. Foron moitos máis os integrantes da Selección Galega de ciclismo que subiron ao podio nas súas categorías. Entre deles o equipo de Team Relay para handbike que foi bronce.
Dende o venres ata o domingo, do mellor ciclismo paralímpico de estrada a nivel estatal, deuse cita en Galicia, tal e como informa a Federación Ciclismo Galego.
O Campionato de España organizado polo Club Ciclista Lvcvs Avgvsti abriuse coa proba de remudas Team Relay por seleccións autonómicas e durante a fin de semana disputáronse as contra o reloxos individuais (CRI) e as carreiras de fondo. De todos os títulos que se repartiron, cinco quedaron na comunidade anfitrioa, así como outras seis medallas.
A colleita de éxitos galega inaugurouse no Team Relay para handbikes. A Selección Galega logrou o terceiro posto grazas a Alejandro González, María José Pose e Ángel Plácido López. O trío dirixido polo seleccionador Jacobo Ucha completou as tres voltas ao circuíto de 2,3 quilómetros en 59 minutos e 48 segundos, con case 4 minutos de vantaxe sobre o equipo ‘B’ da Comunidad de Madrid. A vitoria correspondeu ao conxunto ‘A’ da Comunidad de Madrid cun tempo de 40:51 e o segundo posto obtívoo Andalucía cun rexistro de 48:01.
A xornada do sábado estivo dedicada ás CRI e o ciclismo paralímpico da nosa comunidade acadou cinco metais. Na clase 4 de bicicleta adaptada (MC4), o coruñés Damián Ramos exhibiuse nun trazado de 9,4 km ao que tivo que dar tres voltas. Defendendo as cores da Selección de Galicia venceu con 3 minutos e 20 segundos de marxe respecto a Julio Enrique Bermejo (Comunidad de Madrid).
Tamén representando ao combinado da Federación Ciclismo Galego, o arteixán Iván Montero impúxose con solvencia nas handbikes da clase 5 (MH5), batendo por 11 minutos de diferenza a Antonio Morcillo despois de dúas voltas.
O terceiro título galego conquistouno a baionesa Mila López coas cores do Neuroimpulse-Galicia. A handbiker da clase 4 (WH4) mellorou en 13 minutos logo de dúas voltas a marca de Pilar Montoya (Castilla-La Mancha).
A Selección Galega sumou dous podios máis nas ‘cronos’. María José Pose ocupou a segunda posición na clase WH3, rematando a 3:20 da gañadora Eva López (Andalucía), e Ángel Plácido López finalizou terceiro en MH2.
Os outros resultados da Selección Galega nas CRI foron a quinta praza de Óscar López en MC3, os sexto postos de Severino Mata en MC5, de Alejandro González en MH3 e de Víctor García e Felipe López nos tándems, e a décima posición de José Antonio Bugarín en MC5.
#CEParalimpicoFriol25 | Tres títulos galegos
🥇 Damián Ramos, en C4
🥇 Milagros López (Neuroimpulse), en WH4
🥇 Iván Montero, en MH5#SeleccióndeGalicia pic.twitter.com/izcRWKSHVO
— F_Galega de Ciclismo (@F_Gal_Ciclismo) May 24, 2025
Máis podios para integrantes da Selección Galega de ciclismo
O Campionato de España concluíu en Friol o domingo coas carreiras de fondo no mesmo circuíto que o día anterior. Tal e como acontecera no 2024, Damián Ramos e Iván Montero pecharon a cita máis importante do calendario estatal cun ‘dobrete’. O corredor de bicicleta adaptada adxudicouse o título nesta ocasión por 1 minuto de vantaxe sobre César Neira (Kapelmur). Pola súa banda, o handbiker volveu ter como acompañante no podio a Antonio Morcillo.
Os mesmos metais que na véspera conseguíronos María José Pose, prata en WH3, e Ángel Plácido López, bronce en MH2. Á lista de medallistas da Selección Galega incorporouse Óscar López, terceiro en MC3 tras xogarse o subcampionato ao esprint con Carlos Gorospe (Kemen Pertsona) e Joan del Río (Catalunya), segundo e cuarto respectivamente.
A actuación de Galicia completouse coa quinta posición de Severino Mata e a undécima de José Antonio Bugarín en MC5, e os sétimos postos de Alejandro González en MH3 e do tándem Víctor García-Felipe López.
Ver esta publicación en Instagram
