O HC Borbolla finalizou a primeira fase da competición na Ok Liga Feminina cun triunfo na casa ante o CP Las Rozas por un tanteo de 3-1. As galegas son as únicas no seu grupo que teñen todos os partidos disputados. Saben que xogarán pola permanencia pero descoñecen aínda que conxuntos do Grupo A as van acompañar. No Grupo B, está todo decidido e finiquitado, xogarán pola permanencia: CP Esneca Vila-Sana, Igualada Feminí HCP, CP Vilanova e Areces Ecopilas Asturhockey.
Neste derradeiro partido das coruñesas do Borbolla nesta fase competivia, a lusa Bea Pereira Varzeas abría o marcador no arranque do choque adiantando ao conxunto da Coruña no marcador. A patinadora erraba unha falta directa pero acadaba transformar o rexeitamento en gol. Aínda que foi dobre goleadora no partido, a patinadora chegou a errar un penalti co 1-0 no luminoso.
Nos últimos minutos do primeiro período Giulia Galeassi non foi quen de materializar unha falta directa para a escuadra visitante ao deterlle o disparo Fernanda Tapia. Chegándose así ao descanso cunha ventaxe mínima para as herculinas 1-0.
O segundo tanto das herculinas o anotaría Fernanda Muñoz no inicio da segunda metade colocando no electrónico da cancha de Monte Alto o 2-0.
Deste xeito o CP Borbolla encarrilaba o partido ao seu favor nos primeiros minutos de cada período, algo que o propio adestrador, Santi Martínez, recoñecía que lles serviu para que o CP Las Rozas asumira máis riscos e deste xeito lles facilitase as cousas no resto do partido. “Ao CP Las Rozas gústalle defender pechadas e saír ao contragolpe rápido. Axudounos marcar pronto, sobre todo o 2-0 ao principio da segunda metade. Iso provocou que as madrileñas tivesen que arriscar máis e descoidasen a súa defensa”, relata o adestrador do HC Borbolla.
A menos de seis minutos do final Bea Pereira volvía marcar para as tomatitas que se colocaban cun suculento 3-0 no luminoso do pavillón coruñés de Monte Alto.
Carmela Pérez Martínez anotaba o gol da honra para as madrileñas a menos de catro minutos para o final do partido 3-1. Roubou a bóla na metade de pista e lanzou un zapatazo que se colou entre todas as xogadoras e que non puido parar Fernanda Tapia.
Aínda tiveron HC Borbolla e CP Las Rozas sendas ocasións de falta directa que non materializaron. Por parte das galegas o tiro foi de Fernanda Muñoz, e polas locais Giulia Galeassi
As de Luis Carlos Luengo teñen agora por diante dous partidos pendentes de disputa que as medirán en ambos os dous casos como conxunto local. Un será fronte ao Garatge Plana Girona CH e o outro contra do CP Alcorcón.
Quen acompañará ao Borbolla na loita pola permanencia?
Para as galegas rematou o concurso nesta fase. Agora teñen que seguir preparándose para a parte decisiva da tempada, mentres esperar a saber que equipos as acompañarán na segunda etapa da competición na que se arrastran os resultados entre rivais desta primeira fase.
Cos cruces que restan as cávalas son moitas, polo que o HC Borbolla vive na incertidume de non saber exactamente en que condicións chega a esta recta final da Ok Liga Feminina 2020-2021 na que loitará pola permanencia.
Desde o Grupo B acceden á loita por salvar a categoría os seguintes conxuntos: CP Esneca Vila-Sana, Igualada Feminí HCP, CP Vilanova e Areces Ecopilas Asturhockey.
AS MELLORES XOGADAS DO HC BORBOLLA VS CP LAS ROZAS POR HOCKEY GLOBAL
FICHA TÉCNICA
HOCKEY CLUB BORBOLLA: Fernanda Tapia, Bea Pereira Varzeas, Lara Yáñez, Lucía Yáñez e Fernanda Muñoz – quinteto inicial. Tamén xogaron: Julia Cabanas, Antía Rivadas, Marta Vilas e Alba Díaz (C). PS: Edén Avecilla.
CLUB PATÍN LAS ROZAS: Nerea Notario Grau, Giulia Galeassi (C), Ana Horche, Carmela Pérez e María Alcalde – quinteto inicial -. Tamén xogaron: Claudia Silva, Yamila Leales e Elena Arganda. PS: Alicia Abad.
GOLES: 1-0 min. 2 Bea Varzeas; 2-0 min. 28 Fernanda Muñoz; 3-0 min. 45 Bea Varzeas; 3-1 min 47 Carmela Pérez.
ÁRBITRO: Francisco Javier López.
INCIDENCIAS: Partido correspondente á 14ª xornada do Grupo A da Ok Liga feminina da Federación Española de Patinaxe co que as galegas do HC Borbolla rematan a primeira parte da competición. O encontro celebrouse no Pavillón de Monte Alto da Coruña.