- A defensa, Míriam Sempere na portaría e a dirección de Patrícia Lima en ataque foron as claves da vitoria das galegas en terras canarias.
- O equipo empezará a preparar o choque do mércores fronte a Bera Bera mañá luns 8 de novembro.
O Mecalia Atlético Guardés superou ao Lanzarote Zonzamas con solvencia para adxudicarse os dous puntos en xogo e, sobre todo, recuperar sensacións tras o cruel final da semana pasada en Xixón -perdeu cun gol no último segundo-. Unha forma inmellorable de comezar un maratón de cinco partidos en 16 días, cunha batalla europea co Besançon e un dobre duelo ligueiro contra os dous primeiros da táboa incluídos.
Desde o principio, o conxunto miñoto entrou conectado ao encontro. Fíxoo a base da súa receita favorita: defender e correr. O 6:0 proposto polo técnico das galegas, José Ignacio Prades, entrou con firmeza ao encontro e froito do seu bo facer, Míriam Sempere empezou a encadear unha parada tras outra. Da produción na portaría da alacantina, o Mecalia creceu no marcador a base de rápidos contraataques. E cando lle tocaba atacar en posicional, Patrícia Lima dirixía as operacións á perfección.
Deste xeito, o cadro da Guarda gañaba 2-6 ao dez minutos. Pero o equipo de Lanzarote, moi batallador, negábase a baixar os brazos. Da súa insistencia naceu un parcial de 3-0 que volvía meter no partido ás pupilas de Patro Barambio, que se estreaba como técnico do Zonzamas .
A reacción durou pouco. O que tardou o Mecalia Atlético Guardés en reactivarse en defensa. Desde o traballo na área propia e a fabulosa actuación de Míriam Sempere, o Mecalia deu o acelerón definitivo con Paula Arcos xa sobre a pista. A internacional alacantina, que xogou poucos minutos por precaución tras o seu golpe en Xixón, puxo as pingas de calidade e cun tanto levou ao conxunto miñoto ao descanso con cinco goles de vantaxe (6-11).
Quedaba ver se habería reacción local á volta dos vestiarios. A escuadra do Baixo Miño non o permitiu. Uns minutos firmes en defensa, combinado co acerto ofensivo de Pessoa e María Sancha, levou ao Guardés a adquirir vantaxes próximas ao dez goles.
Co partido xa resolto, José Ignacio Prades dedicouse a dosificar os minutos das súas pupilas. E mesmo as propias xogadoras do Guardés souberon medir esforzos de face ás dúas semanas que teñen por diante, con catro partidos máis da máxima esixencia: dous de liga contra os dous primeiros – Bera Bera e Rocasa– e a eliminatoria da Q3 da liga Europea contra o Besançon, que se disputará os dous próximos fins de semana.
FICHA TÉCNICA
17) LANZAROTE ZONZAMAS: Susi Sánchez (porteira), Ana Martín (p.); María de León, Caridade Santana, María del Carmen (1), Maldonado (1), Brenda Roger (4), Ingrid Roger (2), Hernández, Gleinys Reyes (5), Ari Molina, Asun Sánchez, Sheila Hiraldo, Isaura Merín (2), Isic (2) e Feli Bermudo.
25) MECALIA ATLÉTICO GUARDÉS: Marisol Carratú (porteira), Míriam Sempere (porteira), Sandra Santiago, Nazaret Calzado (2), Lore Pérez (2), Ángela Nieto (3), Descalzo, Lima (4), Paula Arcos (3), Carla Gómez (3), Sancha (1), Pessoa (5) e Daniela Moreno (1).
PARCIAIS CADA CINCO MINUTOS: 1-3, 2-5, 3-6, 5-8, 5-10, 6-11 – descanso- 8-14, 9-16, 10-20, 10-21, 12-24 e 17-25.
ÁRBITRAS: Tania Rodríguez e Lorena García, dos comités galego e aragonés respectivamente. Anotadoras / cronometradoras: María Dolores Milán Martín e Atteneri de Agustín Lemes.
Excluíron dous minutos ás xogadoras locais Ari Molina, Isic e Sheila Hiraldo e á visitante Paula Arcos.
INCIDENCIAS: Partido correspondente á oitava xornada da Liga Guerreras Iberdrola disputado no Pavillón Municipal de San Bartolomé, en Lanzarote.
