- Nova xornada e nova vitoria para un HC Deportivo Liceo que se coloca sexto na táboa clasificatoria.
O 3-1 fronte ao CP Las Rozas, logrado no Palacio dos Deportes de Riazor, permite a Stanis García e ás xogadoras que escalar un posto na táboa e alcanzar o sexto lugar con 31 puntos. Por diante quedan tan só os colosos da OK Liga Feminina: Cerdanyola, Telecable, Manlleu, Palau e Vila-sana.
Logrouno, ademáis, tras remontar. O conxunto madrileño foi o que se adiantou mediante a italiana Giulia Galeassi, o seu activo ofensivo máis importante, pero o HC Deportivo Liceo non se amedrentou. Loitou e empatou grazas a María Sanjurjo. Con ese resultado chegou o tempo de descanso.
Os segundos 25 minutos oficializaron o espertar verdibranco. Catro minutos tardou Alba Garrote en lograr o 2-1, marcado desde o punto de penalti. Deu paso a unha boa xestión da vantaxe que acabou por matar as ideas do CP Las Rozas, anuladas pola defensa e a portería locais.
Adriana Soto, a máxima goleadora do HC Deportivo Liceo, engadiu outra diana ó seu haber a tres minutos do final para finiquitar o partido. Máis confianza para a vindeira proba: recibir ó Mataró no Pazo (sábado 2 de abril, 20:00h).
FICHA TÉCNICA
3) DEPORTIVO LICEO: Viki Caretta; María Sanjurjo, Alba Garrote, Lara Yáñez e Adriana Soto – quinteto inicial -. Tamén xogaron: Ale Martín, Luchy Paz, Lucía Yáñez, Cris Diz e Mencía Mosquera.
1) LAS ROZAS: Nerea Notario; Giulia Galeassi, Elena Wally, Anna Carranza e Mónica Villaró – quinteto inicial -. Tamén xogaron: Gimena Gómez, Ana Horche, Lucía Rico, María Alcalde e Alicia Abad.
ÁRBITRO: Nicolás Morandeira Sánchez. Mostrou cartón azul á visitante Mónica Villaró.
GOLES: 0-1 (Giulia Galeassi, min. 4). 1-1 (María Sanjurjo, min. 15). 2-1 (Alba Garrote, de penalti, min. 29). 3-1 (Adriana Soto, min. 47).
INCIDENCIAS: Xornada 19 da OK Liga Feminina 2021/22. Pazo dos Deportes (A Coruña).
