Despois de dúas semanas lonxe do parqué, o Celta Zorka Recalvi volveu a competición con vitoria. As galegas viaxaban a Madrid para xogar contra o Real Canoe, nun partido dominado polas celestes e que rematou nun 57-64.
As galegas non vencían en Madrid desde novembro do 2019, cando tamén derrotaron ao Canoe, daquela por un 66-82 cando aínda disputaban a competición de LF2.
Loita ata os últimos minutos
A vitoria das viguesas non chegaría sen sufrir. Desde os primeiros minutos de partido víase nas instalacións do Canoe un duelo igualado, con dous equipos que medían forzas parcial a parcial.
Os primeiros puntos foron para as celestes, que se adiantaban no marcador cun parcial 0-6 rematando o primeiro cuarto cun 13-19 ao seu favor.
Tamén o segundo tempo comezou cun golpe do Celta Zorka Recalvi, que cun 0-4 seguía aumentando distancias. Co paso dos minutos, o Canoe loitaba por non deixar escapar ás rivais, pero as galegas sabíanse superiores na pista, logrando acadar unha distancia de 13 puntos a tres minutos do descanso.
Cun intenso parcial de 9-0, as madrileñas entraron de novo no partido ás portas da pausa, obrigando a Cristina Cantero a solicitar un tempo morto. Tras as indicacións da adestradora, Celia García anotaría un triplo que aportaba tranquilidade ás filas celestes. No ecuador do encontro, o luminoso indicaba o 30-38.
No terceiro cuarto, o acerto baixo aro dos dous conxuntos brillou pola súa ausencia. O Celta aproveitou os cinco minutos de sequía das rivais para aumentar o seu colchón de puntos, cunha Celia que continuaba dominando na pista.
Xa nos últimos dez minutos, de forma paulatina, as locais recortaban distancias, achegándose cun perigoso 44-49 ás galegas. Cunha alta presión, o Canoe situábase a só tres puntos das galegas, ameazando a vitoria galega.
Con todo, Mariona Martín guiou ás viguesas á vitoria, primeiro cunha asistencia a Laia Lamana, e despois cun certeiro tiro que poñía o 50-57 a escasos tres minutos da finalización. O conxunto celeste soubo manter a tensións nos intres finais, para facerse co triunfo cun 57-64.
Con este resultado, o Celta marcha en oitava posición, sétima virtualmente, e recibirá en Navia ao Lima Horta Barcelona o vindeiro sábado ás 12:30 horas.
FICHA TÉCNICA
REAL CANOE: Rocío Torcal (3), Laura Prats (12), Macarena Roldán (14), Cristina Mato (6), Patricia Soler (13) –cinco inicial-. Tamén xogaron: A García (), Claudia Gómez (2), Dovile Miliauskaite (7) e Irene Baeza (0).
CELTA ZORKA RECALVI: Mariona Martín (9), Laia Lamana (3), Jessica Fecquiere (11), Maggie Mulligan (10), Marita Davydova (3) –cinco inicial-. Tamén xogaron: Celia García (19), Lucía Fontela (3), Murjanatu Musa (4), Angela Coello (2) e Sara Vidal (0).
MARCADOR: 13-19, 17-19, 8-11 e 19-15.
ARBITRAXE: Carlos Gallego Rodríguez e Mario A. Cayuela Torres. Sinalaron un total de 18 faltas ao Real Canoe e 20 ao Celta Zorka Recalvi.
INCIDENCIAS: Partido correspondiente á 21ª xornada da Liga Femenina Challenge disputado na pista polideportiva das instalacións do Real Canoe Natación Club.
