Até tres xogadoras de equipos galegos recibiron a chamada da adestradora Ana Junyer para tomar parte do grupo que prepara o preolímpico de baloncesto 3×3. Trátase de Bea Sánchez e Vega Gimeno do Durán Maquinaria Ensino, así como Celia García, do Celta Baloncesto.
O trío de deportistas está entre a doce convocadas pola Federación Española de Baloncesto para unha concentración preparatoria do Preolímpico Feminino 3×3 que se disputará en Austria durante o mes de Maio. Dita cita competitiva outorgará tres prazas directas para os Xogos Olímpicos de Tokio nesta modalidade.
A concentración terá lugar en L´Alquería de Valencia do 9 ao 11 de novembro.
Formarán parte do grupo seleccionado, Celia García (Celta Baloncesto), Aitana Cuevas (Ynsadiet Leganés), Vega Gimeno (Durán M. Ensino), Sandra Ygueravide (ESBVA Villeneuve), Marta Canella (Barça CBS), Paula Palomares (Ynsadiet Leganés), Irene San Román, (Sinergia Real Canoe), Gracia Alonso (Movistar Estudiantes), Gala Mestres (Cadía La Seu), Laia Flores (Campus Promete), Laia Raventós (Cadí La Seu) e Bea Sánchez (Durán M. Ensino), contando con Ana Junyer como adestradora. No corpo técnico estará tamén María Reina que exerce como preparadora física e Julia Cerrillo, fisioterapeuta.
