O Viajes Interrías que adestra Luís Treviño é un dos candidatos ao ascenso á Reto Iberdrola. Despois dunha primeira fase con grandes números, as de Portonovo compiten no grupo 1C por un posto no play off de promoción.
As xogadoras do Interrías van xa ben encamiñadas, seguindo a filosofía de ir partido a partido. “O único que nos importa é gañar cada domingo”, declara o adestrador. Foron campioas do grupo 1A tanto na primeira como na segunda volta, con 37 puntos e só un empate e tres derrotas á fin da primeira fase. Agora, coa segunda xa iniciada, as galegas estreáronse cunha vitoria 2-1 ante o CDE Racing Féminas B.
O Interrías sofre pero vence na primeira xornada da segunda fase
A meta: o play-off
Neste curso, o conxunto do Viajes Interrías está a seguir o guion escrito na pretempada. “Desde o principio marcamos o obxectivo de intentar volver a estar na cabeza para disputar o play-off“, recorda Luís Treviño. Conscientes da dificultade, “debido ao formato que propoñían desde a Federación”, o equipo foi sumando semana a semana, nun grupo no que, segundo o técnico, “están os equipos máis fortes deste grupo 1”.
Luís Treviño: “Desde o principio marcamos o obxectivo de intentar volver a estar na cabeza para disputar o play-off”
Ás dificultades propias da competición, engadíanse a incertidume polo rendemento dun equipo de nova creación. Respecto ao conxunto da tempada anterior, só sete xogadoras seguiron ás ordes de Luís Treviño, que recorda como estes cambios no plantel supoñen “volver a crear automatismos e sen moito tempo para isto”. Aínda así, a actitude desde a primeira xornada foi de “saír a gañar partidos. Pouco a pouco foi saíndo ben e ao final tivemos a oportunidade de ser campioas de grupo”, explica.
Así, o Viajes Interrías pasou como líder do grupo 1A ao 1C, no que a clasificación realízase en función dos coeficientes, ao ter disputado o primeiro grupo 16 partidos na primeira fase e o segundo só 14.
Partir como as mellores do grupo de Galicia non supón unha presión extra para as de Portonovo segundo Treviño, senón que “é a mesma que cando arrancou o campionato. Tiñamos claro que queríamos xogar o play-off e o único que nos importa é gañar cada domingo. A partir de aí pode ser un plus o saber que puideches competir cos mellores equipos de Galicia e quedar por diante deles e á hora de afrontar unha fase con outros tres grandes equipos”.
Todo isto, aunque poida motivar ás xogadoras, non basta para xogar con tranquilidade esta fase. “Agora é máis complicado que antes. Antes atopabas equipos dun nivel dispar e agora son tres equipos que quedaron nas primeiras posicións de Asturias – Cantabria”, puntualiza o adestrador.
A falta de scouting, streaming
Seguindo as normas da competición, os tres clubs que pasan do 1A (Interrías, Victoria CF e Dépor ABANCA B) non xogarán entre si, senón que só se cruzarán cos do grupo 1B (Real Oviedo B, Gijón FF e Racing Féminas B).
Así, as galegas non viron con anterioridade ás súas rivais sobre o verde, pero grazas ás novas tecnoloxías e ás redes sociais, estes equipos non son uns completos descoñecidos.
O streaming serviu para compensar as dificultades de facer scouting na Primeira Nacional. “Este ano se algo fixemos os equipos foi explotar as redes sociais e retransmitir partidos. Elas seguramente coñécennos de sobra porque en casa retransmitimos todos os partidos que xogamos, e nós tamén podemos saber ben como xoga Gijón, Oviedo ou Racing. Tamén eles, sobre todo Gijón, tiveron a ben retransmitir o fútbol feminino para toda a súa xente”, apunta Treviño.
Porén, ver os partidos anteriores en plataformas como Youtube ou Facebook non elimina o factor sorpresa propio das divisións inferiores. “No fútbol humilde é tamén case é improvisar cada fin de semana, porque non tes os medios de scouting que teñen os grandes equipos e non podes escaparte a ver partidos doutra comunidade”, recorda o adestrador do Interrías.
Luís Treviño: “O fútbol modesto adáptase moito máis e as xogadoras teñen o poder de adaptación máis desenvolvido que noutras categorías”
Desde o seu punto de vista, isto ten unha cara positiva: “O fútbol modesto adáptase moito máis e as xogadoras adáptanse máis que as profesionais, porque non o teñen tan masticado e teñen o poder de adaptación máis desenvolvido que noutras categorías”.
Non é o mesmo un rival filial que un primeiro equipo
Unha das particularidades dos rivais das galegas neste grupo 1C, é que dous deles son filiais, “de dous equipos importantes de España”, o Oviedo e o Racing. Este feito cambia moito o estilo de xogo dos seus planteis, xa que contan con ” xogadoras xovencísimas que apenas teñen presión, porque o obxectivo é xogar cada día o mellor posible para poder xogar no equipo A”. Segundo Treviño, isto pode ser “un risco, porque non teñen o sentido de respecto ao rival de ir con medo a perder e lles da un plus”.
Nesta liña, o técnico denuncia que o formato da competición favorece sempre aos grandes clubs, polo que “o o sacrificio de equipos e clubs máis modestos non siga. O poder de captación destes grandes equipos sempre é enorme, e é de supoñer que estarán nos postos punteros cos seus filiais”.
Completando o trío está o Gijón, “un equipo que se armou moi ben, con xogadoras da zona, sacándolle xogadoras ao Sporting esta tempada e cun moi bo adestrador, como é Martín Rodríguez“, subliña o técnico do conxunto de Portonovo. Treviño valora a este equipo como o máis complicado, porque “é moi agresivo con e sen balón”.
Luís Treviño: “O rival o temos en casa, para nós é o Victoria de Coruña. Ou elas ou nós xogaremos o ‘play off'”
Con todo, o verdadeiro rival do Interrías “o temos en casa”. Para o adestrador, o máximo rival é o Victoria CF, un conxunto que lle pisou os talóns ao longo da primeira fase e empatou a puntos con elas, aínda que o average quedou para as do sur. “Ou elas ou nós xogaremos o play-off“, conclúe Treviño.
