En medio dunha semana de turbulencias, e despois de seis semanas sen gañar, o Dépor ABANCA venceu nun dos duelos máis importantes da tempada, ante o líder, o Levante Las Planas.
As coruñesas impuxéronse a domicilio por un 0-3, logrando manterse na loita polo ascenso, quedando a un punto do primeiro e segundo clasificado (o Espanyol), e empatado co terceiro (o Osasuna). Ademais, as herculinas lévanse o golaverage ante as catalás ao seu favor, peza clave en caso dun empate a final de tempada.
Bloque unido no Dépor ABANCA
Paula Novo pola lesionada Cris, Eva Dios no lateral por Patri López, Aroa arriba no lugar da propia Eva e Laura por María Figueroa para que Jone regresase ao pivote foron os axustes do equipo dirixido desta vez por Kevin Cabado para afrontar este transcendental encontro.
O habitual adestrador do filial ocupou o banco do primeiro equipo, ante o expediente de investigación que está a levar a cabo o club co adestrador Miguel Llorente.
O partido puido cambiar o seu signo na primeira xogada. Aínda non se completara o minuto inicial cando Pilar disparou alto con toda a portería para ela. No arranque do encontro o Dépor ABANCA apenas puido ter o balón e o asedio local parecía presaxiar que dispoñerían de máis ocasións para adiantarse no marcador.
Con todo, As Nosas conseguiron abrir a lata aproveitando a primeira falta a favor no minuto 10. Practicamente desde a liña do centro do campo sacou a falta Inés Altamira ao punto de penalti onde María Ruiz rematou de cabeza na estrea visitante pisando área local.
As respostas e o dominio por parte do Levante Las Planas atallounas ben a defensa branquiazul e Ana Valles, moi segura en todas as súas actuacións. María puido lograr o segundo tras recuperar ela mesma o balón, pero rematou desviado ao ver a Sara adiantada. Tamén se lle foi alto a Irina desde a frontal no intento do Levante Las Planas.
De novo unha xogada a balón parado, neste caso un saque de esquina, serviu ao Dépor ABANCA para ampliar diferenzas cunha pegada insoportable para as locais. Inés Altamira pasou de dar a asistencia para recibila na cabeza para poñer un 0-2 no marcador que daba máis osíxeno aínda ao Dépor ABANCA.
A partir dese momento, segundo informan desde o club, As Nosas empezaron a soltarse un pouco e a ter máis dominio de balón aínda que nunca chegaron a controlar o peso do partido na primeira metade. Nos últimos minutos, de novo o cadro local puido acurtar diferenzas, primeiro cunha xogada por liña de fondo de Laia que cortou ben Inés e, sobre todo, no epílogo do primeiro tempo nun balón de Pilar para Sandra que rematou coa alma ao traveseiro.
Nin a primeira nin a última xogada do primeiro tempo, ocasións clarísimas, serviron ao Levante para marcar. Non foi así na segunda metade, na que aos dous minutos Ainhoa Marín, situada como dianteira centro en lugar de Aroa, que deixara a súa posición no descanso a Patri López, anotou un 0-3 que parecía sentenciar o encontro con medio partido aínda por diante.
O Dépor ABANCA soubo manexar ben a súa vantaxe e bloqueou o encontro no segundo tempo, cunha solvente Ana baixo paus nas poucas e tímidas chegadas locais mentres As Nosas esperaban e buscaban o cuarto á contra, sen chegar a pisar con perigo a área de Sara.
Un cuarto tanto que puido chegar a tres minutos do final por mediación de María Ruiz, a porta baleira, tras superar coa cabeza á gardameta local.
Non se puido conseguir ese cuarto gol, pero si son catro os puntos que supón esta vitoria se ao final de liga, tal e como sucede a estas alturas de tempada, as cousas seguen tan apertadas, cun grupo numeroso de equipos pelexando polo ascenso directo á liga Iberdrola. Unha pelexa na que o Dépor ABANCA volveuse a meter de cheo con esta vitoria.
FICHA TÉCNICA
LEVANTE LAS PLANAS: Sara, Laia, Yas (Sara, min. 48), Pilar (Montserrat, min. 81), Irina, Sandra (Josselin, min. 62), Alba (Emma, min. 48), Nuria, Julia, Elena e Letti.
DÉPOR ABANCA: Ana Valles, Paula Novo (Paula Monteagudo, min. 77), Inés Altamira, Raquel García, Eva Dios, Carlota Sánchez, Jone Ibáñex, Ainhoa Marín, María Ruiz, Laura Fernández (Adule, min. 58) e Aroa Guerra (Patri López, min. 46).
MARCADOR: 0-1 María Ruiz (min. 10); 0-2 Inés Altamira (min. 24); 0-3 Ainhoa Marín (min. 47).
ARBITRAXE: Ágata González, do colexio catalán. Amonestou a Aroa (min. 40), Inés Altamira (min. 45+1), Carlota (min. 57), Paula Novo (min. 61) e Ana Valles (min. 62).
INCIDENCIAS: Partido da 22ª xornada de Reto Iberdrola disputado no Estadio Municipal de Sant Joan Despí.
